Свт. Іовъ, патр. Московскій и всея Руси († 1607 г.)
Посланіе къ Митрополиту Николѣ и всему священному собору Иверскіа земли Грузинскаго царствія [1].
По благоволенію Господа Бога Вседръжителя, безначальнаго Отца, и поспѣшеніемъ Единороднаго Его и Събезначалнаго Сына, Господа нашего Ісуса Христа, и съдѣйствіемъ Всесвятаго и Животворящаго Духа — равнопоклоняемыя и славимыя Святые Единосущныа и Животворящіа и Нераздѣлимыя Троица, и моленіемъ Пречистые Преблагословенныя Владычици нашіа Богородици и Приснодѣвы Маріа, общіе всего христіянскаго рода Помощница и Заступница, и силою Честнаго и Животворящего Креста Господня укрѣпляеми и святыхъ непобѣдимыхъ воеводъ и архистратигъ невещественныхъ силъ, Михáила и Гавріила, и прочихъ Небесныхъ Бесплотныхъ, и предстателствомъ честнаго и славнаго пророка и Предотечи Крестителя Господня Іоанна и великыхъ чюдотворцовъ и всѣхъ святыхъ молитвами, неизреченная [2] намъ своимъ дивнымъ промысломъ устрояющаго человѣчьскому роду полезная, паче же намъ христіяномъ Его Божественною благодатію съблюдаемымъ и отъ тля на нетлѣніе преставляемымъ [3], и отъ нижнихъ на вышнее восходящимъ, понеже не отъ земля въ землю плаваемъ, но отъ земля на небо. Благословеніе смиренаго Іева, Патріарха царствующаго града Москвы и всея Руси, возлюбленному сыну и сослужбнику нашего смиреніа Преосвященному митрополиту Николѣ, Святые Соборные Апостольскіе Церкви всемірнаго Воздвиженіа Честнаго и Животворящего Креста Господня и священноначалнику Божіего града Цхете, Іверскіе земли Грузинскаго царства, и священноначалникомъ: преосвященнымъ архіепископомъ и епископомъ, и честнѣйшимъ преподобнымъ архимандритомъ, и игуменомъ, и священноинокомъ, и инокомъ и презвитеромъ, и діякономъ, и всему освященному собору части и жребія Пречистые Владычици нашея Богородици [4].
Царь вашь Александръ присылалъ бити челомъ пословъ своихъ: князя Каплана, да старца Кирила, да Хуршита [5], для исправленіа вѣры христіянскіа о учителехъ, къ христолюбивому Государю, благочестивому царю и великому князю Феодору Ивановичю всеа Русіи. Благодатію Христовою сынъ Святыа Съборныя великія Апостольскіа Церкви и нашего смиренія, благовѣрный Государь, царь и великій князь Феодоръ Ивановичъ всея Русіи, богошественный святаго пути, богоуставному закону мудрый изыскатель, святыхъ правилъ богозрачнѣ цвѣтущи исходатай и споспѣшникъ благоразумный, истиннѣ дѣлатель, по добротѣ сердецъ вашихъ и по желанію истинному царя вашего Александра, спасенія ради вашего, чтобы вы сынове Божіи сподоблени были, послалъ къ вамъ посла своего, князя Семена Григорьевичя Звенигородскаго, да съ нимъ вмѣстѣ къ вамъ послалъ, по совѣту съ нами, учителныхъ превеликія Лавры Пресвятыа Живоначалныя Троицы и преподобнаго Сергіа чюдотворца, соборново старца Закхея [6], благовѣріа ради къ истинному извѣщенію правыя вѣры, непоколебимо бы вамъ и непревратно соблюдати истинныхъ церковныхъ преданій и просвѣтити(ся) благоразуміемъ, терніе посѣчи и лозу благовѣрія насадити, злорѣчіе посѣчи яко хврастіе, благочестіе исполнити. Яко убо и далече живущимъ вамъ любовными крылы достизаете до благочестиваго царя нашего и до насъ и молите духовнѣ вѣрою истинною Христовою просвѣтити васъ въ недоумѣніи, чтобы вы съ нами были едина Церковь и едина вѣра, и едино крещеніе, и единство въ всякомъ исправленіи по благовѣстію Христову и по апостольскому преданію и по святыхъ отецъ ученію. Пишетъ бо: волю боящихся его сотворитъ Богъ и молитву ихъ услышитъ и спасетъ я. И самъ рече Господь: просите и пріиме(те), ищете, и обрящете, толцыте и отвръзется вамъ, всякъ просяй пріиметъ и ища обрящетъ, тлъкущему отвръзется. И пакы рече: (иже) вѣру иметъ (и) креститься, спасенъ будетъ, а иже вѣры не иметъ, осуженъ будетъ. Страшно еже впасти въ руцѣ Бога Живаго. Христіяне убо васъ Божіею благодатію изначала знаемъ, и не вѣмы, откуду возникоша соблазны и возбраниша Божественному пути, завистію истиннѣ врага и благочестію сопостата, непрестанно многыми злыми лукавствы прелестными отводя отъ благовѣрія, нынѣ не во всемъ исполнено христіянскую вѣру вамъ держащимъ, не во мнозѣ съ нами раздѣляетеся. И внемлите же себѣ внятелно отъ святыхъ апостолъ и святыхъ седми Соборовъ Вселенскихъ и отъ всѣхъ святыхъ исповѣдуема истинная благочестивая православная христіянская вѣра. Блюдите убо себе и всего стада, въ немъже васъ постави Духъ Святый стража блюсти церкви Господа нашего Ісуса Христа и пасти стадо его словесныхъ овецъ.
Яко восходя Господь на небеса, вдаде апостоломъ два Завѣта: Ветхій и Новый. Сія же пріимше святіи апостоли, та же по нимъ церковные пастыріе и учители: иже вси духомъ божественнымъ наставляеми, ова убо отставиша, ова же узаконоположиша и предаша Святѣй Церкви. И сія вся церковная преданія, писаная и не писаная, узаконеная намъ отъ Бога и отъ святыхъ апостолъ и богоносныхъ отецъ нашихъ, непреложно подобаетъ соблюдати. Многа и различна устроеніа, чины же и уставы, правила и законы, отъ Божественныхъ апостолъ пріятъ Святая Церкви. Таже по апостолѣхъ богоносніи отцы много предаша и навершиша Святѣй Съборнѣй и Апостольстѣй Церкви. Подобнѣ чины, и устроеніа, и весь уставъ христіянскаго житіа: и на поставленіе Патріархомъ молитвы, и уставы, и чины, и разчиненіа, и предѣлы когождо ихъ, и мѣста и сѣдалища митрополитомъ, и архіепископомъ, и епископомъ, архимандритомъ и игуменомъ, священникомъ и діякономъ, иподіякономъ, чтецемъ, и пѣвцемъ и свѣщеносцемъ, молитвы на крещенія еже отрицатися сатаны и всѣхъ дѣлъ его, и на обрученіе же, и на вѣнчанія, и на покаяніа, и на причащеніе Животворящего Тѣла и Честныя Крови Господа нашего Ісуса Христа, отрицанія жъ и обѣщаніа, молитвы на постриженіе иноческаго образа, малаго и великаго, яже глаголется второе крещеніе, и на погребеніе инокомъ и мірскимъ, уставы и тропари и молитвы, и иже въ Литургіяхъ дивно освященно уставы счетаныя: первая Василія Великаго, вторая Златоустаго, третія папы Римскаго, яже въ великій постъ поется. И молитва на Богоявленіе, на сшествіе Святаго Духа, и въ начало индикта, еже есть начало новаго лѣта, и на освященіе церквамъ, и на освященіа святаго масла, и на освященіе святаго мѵра, и на освященіе водѣ, и на поставленіе православныхъ царей. Пѣсни же, и пѣніа, и сѣдадьны, тропари и кондакы, и степенны, и всенощныя уставы, и пѣніа, Господскимъ праздникомъ и прочимъ, другимъ же аллилуіа и посты, иныя же евангельскіа праздники, иныя же славословныя нарекоша, и уставиша чтенія жѣ тръжественна и обычна, и повѣсти, и словеса, и житіа святыхъ въ праздничныя дни и обычныя узаконоположиаша и предаша Святѣй Церкви посты же и моленіа и поклоненіа Животворящему Кресту, и честнымъ и святымъ иконамъ, начертанія же письмены и иными вещми въ святыхъ церквахъ и на священныхъ сосудѣхъ и ризахъ, и на стѣнахъ, и на дскахъ, и въ домѣхъ и на путехъ въображеніа Господа нашего Ісуса Христа и Пречистыя Его Матере, и великаго пророка и Предотечи Крестителя Господня Іоанна, и божественныхъ апостолъ, и богоглаголивыхъ пророкъ и всѣхъ святыхъ. Сихъ завѣщаша писати и поклонятися имъ и Божественному Евангелію, и священнымъ сосудомъ, и священнымъ Божественнымъ храмомъ, за еже въ рукотворенныхъ насъ ради пожити Изволившаго и Того Божественная словеса вещными написатися человѣколюбнѣ даровавшаго. Почитати же и поклонятися мощемъ святыхъ истинныхъ угодниковъ Христовыхъ и яко по истинѣ отъ Бога освятителну и цѣлебную пріимше благодать недуги отгоняти и болѣзни исцѣляти. Въ истинну чюдо преславно, яко кости наги источаютъ исцѣленіа! Слава Единому Премудрому Зижителю Богу, яко же писано есть. И прочія законы и уставы, яже святая церкви пріятъ и пріемше намъ предаде, непреложно соблюдати подобаетъ. Сія есть вѣра святыхъ апостолъ, яже научени быша отъ Бога. По святыхъ же апостолѣхъ богоносніи отцы, яко же и предречеся, многа управленіа и законы предаша Святѣй Церкви вдохновеніемъ Святаго Духа. И убо святіи апостоли о имени Ісусъ Христовѣ, и вѣры, яже въ Онь, и о законѣ благодати многы труды и болѣзни показаша и кровію скончашася и вседушьно сташа противъ нечестивыхъ царей и мучителей, благочестіе собдюдоша, вѣнцы побѣдными отъ Христа Бога увязъшася, и убо своими о Христѣ болѣзньми и подвигы вселенную укрѣпиша, и бѣсы прогнаша, и нечестивыхъ посрамиша. Презрѣша бо міръ и яже суть въ мірѣ, и всяку сладость, и славу, и честь, и высоту, и гордость, и болярство, и возвышеніа престолы, и благородіе преизящное, и гордѣніе всякое, и царства и княженіа, и предстоящая отроки, и предрыщущая слугы, и безчисленное богатство, грады же и села, кони же и златыя утвари, и сладость ястія и питія, и златопрядныя постеля, и прочее плотское услаженіе ни во чтоже вмѣниша, но все свое желаніе и мудрость и разумъ показаша о вѣрѣ въ Господа нашего Ісуса Христа. Яже пріяша мы христіяне отъ священныхъ апостолъ и богоносныхъ отецъ и потомъ не преложно подобаетъ намъ съблюдати.
Вся убо заповѣди Господа нашего Ісуса Христа спасеніа ради бесѣдованы суть [7]. Аще бо удаляемся отъ заповѣдей Его, но Онъ, яко человѣколюбивый Отецъ, терпитъ злобы наша, не хощетъ никого погубити, но желая всѣхъ насъ спасти, ово святымъ Евангеліемъ, ово апостолы, ово святыми отцы, да не впадемся въ ровъ еретичьскій. Се вѣдый искони врагъ нашъ діяволъ не престаетъ блазня человѣческый родъ, начатъ отъ Адама даже доселѣ не отстанетъ ища кого бы прелстити отъ вѣры истинныа, да быша были съ ними въ мукѣ, и овы прелсти поклонитися кумиромъ и на прочая грѣхи. Но видѣвъ ихъ діяволъ, яко въ сѣти грѣшніи а не суть точни ереси [8], влѣзе прьвіе во Аріа, иже нача хулити Сына Божія, не творя Его равна Отцю, забывъ Христа глаголюща: Азъ и Отецъ едино есвѣ. Такоже и въ Савеліа, иже нача сливати, глаголя: Божествомъ и плотію Христосъ пострадалъ есть на крестѣ. Македоніе жъ Святаго Духа хуляше, хужьдша творя Отца и Сына. И прочая единомысленики ихъ наполнишася различныхъ ересей, ихъ же ученіа прокляша святіи отцы и истребиша отъ христіянъ. Пишу жъ богатствомъ Господа нашего Ісуса Христа, яко можетъ и нашь уставити языкъ на обличеніе врагъ Креста Христова о нихъ же Павелъ къ Ѳилиписіомъ пишетъ: блюдитеся песъ, блюдитеся раскола, обличайте жъ словеса ихъ злодѣйствіа. Мню, яко и воздухъ сквернится дѣлы ихъ. Насъ бо ради сниде Господь съ небеси. Заповѣди его соблюдемъ и избавимся лютыхъ мукъ, да не на насъ збудется реченное Господемъ: аще не быхъ пришелъ и глаголахъ, грѣха не быша имѣли. Свинія бисера обинуется [9] а мотылы [10] беретъ, тако же еретицы свой смрадъ жируютъ, а Божественныхъ ученій удаляющеся, и къ бѣсомъ приложишася. Но злѣйши суть бѣсовъ: бѣси бо Креста Христова боятся, еретицы жъ посѣкаютъ кресты. Бѣси боятся праведникъ Божіихъ, не смѣяху прикоснутися ковчегомъ ихъ, въ нихже лежитъ безцѣнное сокровище. Еретицы же ругаются и насмѣхаются, видящи насъ кланяющихся имъ, забывше Господа рекша: вѣрующій въ Мя, дѣла, яже Азъ творю, и тіи сотворятъ. И болши тѣхъ еретицы глаголютъ: не суть апостоли Литургіи и комканіа [11] предали, но Іоанъ Златоустъ. Видите по вочеловѣченіи Христовѣ до Іоана лѣтъ болѣе трехъ сотъ, да толико лѣтъ Церкви Божія безъ Литургіа ли суть были и безъ комканіа? Петръ апостолъ нѣсть ли Литургіа сотворилъ? Іяковъ братъ Господень по плоти первый епископъ Христомъ самѣмъ поставленъ въ Іеросалимѣ, и Литургію сотворилъ. Потомъ Великій Василей, отъ Бога извѣщеніа пріимъ, предавъ намъ Литургію и о комканіи устроивъ, и научи, якоже повелѣ ему Духъ Святый. И послушаимъ апостола Павла глаголюща: чадо Тите, сего ради тя оставихъ въ Критѣ, да недокончанная наполниши, во всѣхъ градѣхъ попы, яко же ти азъ повелѣхъ. Тимофѳя Павелъ поставилъ въ попы, таже и писаше къ нему: не лѣнись о своемъ дару, иже въ тебѣ возложеніемъ руку на поповство. Прилежащіи добрѣ попове сугубей чести да сподобляются, тружающеся словомъ и ученіемъ. Аще попове упиваются, и сварливіи, злато и сребро — любиви, и такихъ ради дѣлъ апостолу Павлу глаголющю: согрѣшающая предъ всѣми обличай, да прочіи страхъ имѣютъ. Плотская дѣлеса, рече Павелъ, блудъ, прелюбодѣяніе, служба кумиромъ, волшба, вражда, зависть, ревность, ярость, убійство, піянство и прочая: таковая Царства Божіа не наслѣдятъ. Гласъ великій верховный Петръ: глагола Богъ усты святыхъ пророкъ отъ вѣка. Слыши же и Павла повѣдающа: первіе постави апостолы, второе пророки, третіе учители, потомъ же силы, таже дарованіе. И тѣхъ усты Святый Духъ возвѣстилъ есть вся: проклятъ бо, рече, всякъ иже не пребудетъ во всѣхъ книгахъ законныхъ. Еретицы же ни во что же имуть словеса, яже усты святыхъ възвѣща, и всѣхъ отмещутся, и не почитаютъ, ихже звѣри сверѣпіи убояшася и огнь угасе. И еще надъ сѣми окаянніи творятъ: Преславныя и Преблагословеныа Пречистые Его Богоматери Господа нашего Ісуса Христа не чтятъ, ихъ же рѣчи и мерзскія гордости неудобно писати, о Ней же пророцы провозвѣстиша: овъ Дверь заключену нарече и никому же проходиму, развѣ единаго Бога, овъ же Лѣствицу разумну, по Ней же вѣрніи восходятъ на небеса, овъ Гору святую, въ Нюже Богъ вселися, овъ Ручку прозва Ю, манну небесную имущи. Давыдъ же Царицю и Дщерь нарицаетъ Ю, понеже небеснаго Царя Мати бысть, Дщерь же понеже отъ сѣмени его родися. Премудрый и великій во царѣхъ Соломонъ вопіетъ о Ней глаголя: многи дщери сотвориша силу, мнози стяжаша богатества, Ты же превознесеся и превзыде выше всѣхъ. Инніи же инакими имены прозваша ю, якоже имъ даяше Духъ Святый и разумъ. Боговидецъ Исаіа велегласно вопіетъ о Ней глаголя: се Дѣвая во чревѣ пріиметъ и родитъ Сына и наречетъ имя Ему Еммануилъ, еже есть сказаемо съ нами Богъ. Къ ней же архистратигъ Гаврилъ глаголетъ: радуйся Обрадованная, Господь съ Тобою. Мы же велегласно вопіемъ: благословенъ Плодъ чрева Твоего, яко родила еси намъ Христа Спаса, Избавителя душамъ нашимъ и всѣхъ видимыхъ и невидимыхъ честнѣйши явися намъ. Мы же правовѣрніи людіе, видяще образъ Господень на иконѣ написанъ, кланяемся и руцѣ къ нему воздѣвше, изъ глубины сердца воздохнувше, вопіемъ глаголюще: Господи Ісусе Христе, Сыне Божій, Иже симъ образомъ явися на земли спасенія ради нашего, изволивый Своею волею пригвоздитися на Крестѣ, давый намь Крестъ Свой на прогнаніе всякого супостата видимыхъ и невидимыхъ. Егда ли паки видимъ святыя Богородицы Маріа икону, такожъ къ ней изъ глубины сердца вопіемъ глагодющи: Пречистая Богородица, не забуди насъ, людій своихъ, тебе бо имамы Заступницю и Помощницу и Ходатаицу къ Сыну Твоему и Богу нашему, и тобою мы грѣшніи надѣемся пріяти грѣхомъ прощеніе. Егда ли котораго видимъ святаго образъ, такожъ речемъ: угодниче Христовъ (імярекъ), имаши дръзновеніе къ Владыцѣ Христу Богу нашему, помолися о мнѣ, да спасуся твоими молитвами. И молящися [12] креститися подобаетъ двѣма прьсты: прежъ положити на чело главы своея, таже на перси, потомъ же на плече правое, таже и на лѣвое. Съгбеніе прьсту именуетъ сшествіе съ небесъ, а стоящіи перстъ указуетъ възнесеніе Господне, а три персты равны держати — исповѣдуемъ Троицу Нераздѣльну, то есть истинное крестное знаменіе. Иже не любитъ Господа нашего Ісуса Христа, да будетъ проклятъ. Иже святаго комканіа Честнаго Тѣла и Крови Христовы не пріимаета, да будетъ проклятъ. Иже не кланяется съ усердіемъ Кресту Господню, да будетъ проклятъ. Иже не молится съ упованіемъ Святѣй Богородици Маріи, да будетъ проклятъ. Иже иконы Господня и Богородицыны и всѣхъ святыхъ со страхомъ и любовію не цѣлуютъ, да будутъ прокляти. Иже иконамъ Господнимъ и Богородицынымъ усердно съ желаніемъ не покланяются, да будутъ прокляти. Иже словесъ Евангельскихъ и апостольскыхъ не имать въ честь, да будутъ прокляти. Иже святыхъ пророкъ не творятъ Святымъ Духомъ пророчествовавшихъ, да будутъ прокляти. Иже святыхъ всѣхъ не чтутъ и не кланяются съ любовію и трепетомъ мощемъ ихъ и иконамъ ихъ, да будутъ прокляти. Иже хулятъ святую Литургію и вся молитвы, преданныя христіяномъ отъ апостолъ и святыхъ отець, да будутъ прокляти. Иже всея твари видимыя и невидимыа не истинствуютъ Богомъ сътворенная, да будутъ прокляти. Иже не творятъ Богомъ даннаго Моисеемъ закона, да будутъ прокляти. Иже не мнятъ церковныхъ сановъ Господемъ и апостолы строено, да будутъ прокляти. Иже женитву чистую хулять и богатыя носящихъ брачныя ризы съ говѣніемъ и цѣломудріемъ, да будутъ прокляти [13]. Прежъ распятіа Господня кумиромъ умножившимся на земли и требамъ сквернымъ, и величашеся діяволъ: еретицы жъ нарицаху властелина князя міра сего. Егда же изволи Единородный Сынъ, Слово Божіе, и Крестомъ Своимъ разруши силу его, тогда жъ князь и властелинъ не зовется, но врагъ и супостатъ. Глаголетъ же златорѣчивый Іоаннъ: діяволъ бо аки песъ нападаетъ на человѣки, уясти хотя, но иже узритъ въ руку нашею жезлъ и палицу Божію, иже есть Честный Крестъ, отбѣгаетъ со страхомъ. Мы же утѣшаемся по пророческому словеси: жезлъ твой и палица твоя та мя утѣшиста [14].
И отвръгшимся міра и яже въ мірѣ, сущимъ инокомъ, вземшимъ крестъ Христовъ, и приходящая напасти крѣпце терпѣти, и хранити отъ всякага зла и все хотѣніе свое отвръгнути и въ повиновеніи быти до смерти по общенію [15], и чтити игумена, аки Бога, братію, аки апостолы. Тó есть взятіе креста Господня, тó есть отверженіе себе, тó есть шествіе въ слѣдъ Господа. Красно есть во истину и мнозей хвалѣ достойно, иже видѣти мужа въ міру отрицагощася міра и иже въ немъ красныхъ, и бывающа инока, хулно же и проклято, еже видѣти мниха санъ въ мірѣ пріемлюща и мірская творяща, и богатство берущи. Отмещетъ обнищаніе, иже Христа ради обѣщася, и бываетъ другъ свѣту сему и врагъ Божій. Отъ царя и отъ вельможъ власти ищутъ, а отъ бояръ и отъ гостей имѣніа, а отъ меньшихъ чести и поклоненія. И таковое видя поганіи поношаютъ и укоряютъ. Блюдитеся лукаваго и высокоумнаго бѣса, да не всѣетъ въ сердце пагубы, еже мнѣтися велику сущу. И угодивъ Богу то помыслилъ бы грѣхы своа прьвыя. Аще и грѣхы простилъ есть милосердъ, но безконечнаго ради Царства Божіа сугубы страсти лѣпо есть пріяти. И аще кто кому воспоменетъ: много еси согрѣшилъ, не можеши прощенъ быти, и вы наставницы поучайте, яко Господь Ісусъ Христосъ пріиде грѣшныхъ помиловати. Иніи же иноцы въ затворь влазятъ, свои воли творятъ, и ту кормящеся, аки свинія въ хлѣвинѣ, приносимымъ радующеся, монастырскаго же ради законнаго подвига убѣжавше не хотяще потрудитися, ни покарятися игумену и съ братіею миромъ не могуще пребывати, хотяще же на земли честни быти явленіемъ: тацѣхъ возбраняйте. Се же мрьзкое высокоуміе пребываетъ въ нихъ: мнятся велицы суще и святи, и ту сѣдяще, чюжія домы строяще, своимъ безуміемъ отбѣгше. Таковымъ запрещайте и молите. Мнози уклонившеся непотребни быша, забывше ученіе Павла апостола: еже въ лѣностн живуще чюжый хлѣбъ ядятъ, таковымъ бо Павелъ въ селунстей епистоліи пишетъ: сами бо вѣсте, како подражати насъ: яко не безсчинно ходихомъ въ васъ, ни туне хдѣба ядохомъ у кого, но въ трудѣхъ день и нощь дѣлающе. Егда бо бѣхомъ въ васъ, сіе запрещахъ вамъ: яко аще кто не хощетъ дѣлати да не ястъ.
Видите епископи преданная намъ отъ Бога власти и величества, и его ученики и апостолы. Ничто же бо тако угодно и любезно Богу, якоже священство и царство. Два убо великая начала сія отъ Бога уставлена суть въ мірѣ: священство и царство, и подъ тѣми суть князи мірстіи и прочая власти. Архіерею убо вся церкви и церковная и освященная возложена, и духовная. Царю повиновеніе тѣлесно токмо и урокомъ дани, и человѣческихъ вещей промышленіе міру возложенныхъ и прочая подобящая. Оба сіа велика начала отъ Бога, отъ Божественныя Его благодати сходяще, устрояютъ и украшаютъ человѣческую жизнь. И подобаетъ со страхомъ слушати ихъ и повиноватися, яже Божественныя Писанія и священная правила повелѣваютъ. Архіереемъ же душевное купно и тѣлесное, яко пріимникомъ ангельскимъ [16] бывшимъ, и образъ Христовъ имущемъ, и сѣдящимъ не на Моисѵовѣ сѣдалищѣ, но на Христовѣ, и Его заповѣди и ученіа возглашающе людемъ. Сего ради и имя архіереово на Литургіахъ Божественныхъ возглашати повелѣно есть. Преступающихъ же таковая преданіа, священныхъ изверженію предати, иноковъ же и мірскихъ отлучати всячески отъ Церкви. Понеже епископи убо пріимницы суть апостольскіи и наслѣдницы, яко образъ Христовъ суще и Христово пріяша ученіе и святыхъ Его ученикъ и апостолъ, и честь имъ даде велію Богъ, якоже писано есть: уставиша ихъ князей по всей земли: не ангеломъ [17] убо даде власть вязати и рѣшити, но апостоломъ и иже по нихъ пріимникомъ и ихъ наслѣдникомъ и архіереомъ отъ Бога убо установлено есть и утвержено. Богъ бо есть утвержая и связуя и разрѣшая ими вся. Церкви же и пресвитеры и прочая причетники и люди, за ними живущіи, и вся освященная и вся возложенная Богови, подъ епископы мѣстными да суть. Такоже и монастыри и молитвенныя храмы и нищепитательницы подъ епископы мѣстными да суть. И того есть всяческое попеченіе о нихъ и судъ и разсуженіе и устроеніе и уничиженіе и наказаніе. Всею силою и всею крѣпостію д'лъжни суть епископи имѣти стражбу о священныхъ и божественныхъ канонѣхъ, сирѣчь правилѣхъ. Поручено бысть намъ съблюдати, да не что преступаемо будетъ забытіемъ, или нерадѣніемъ преминуемо, или неизысканіемъ оставляемо. Въ день онъ въ мукахъ оныхъ изыскано будетъ. Хранящіи бо священныя каноны, отъ Бога помощи сподобляются, преступающіи же въ конечное осуженіе себе влагаютъ Божественнымъ бо канономъ не сохраняемымъ и не исправляемымъ, и того ради Божій гнѣвъ приходитъ на насъ и многіа казни и послѣдній судъ. Или преступающе по нѣкоей страсти, или по неразумію, а не трепещуще вышняго страха, иже суть клялися сохранити судбы и законы правды Божіа и предъ цари не стыдитися. О горе и лютѣ! каковъ судъ тѣмъ и по дѣломъ воздаяніе будетъ, иже умолчатъ обидящимъ святыя церкви и восхищающимъ отъ нихъ неподвижимыя вещи, вданыхъ Богови въ наслѣдіе благъ вѣчныхъ: земли и села, и винограды и езера, и прочая церковная устроеніа. Не малъ бо есть гнѣвъ Божій на таковыхъ, еже восхищати отъ церкве возложенная Богови: или сосуды, или книги, или ризы, или земли, или села, или винограды, или люди, или суды, или пошлины, или уставы и чины, преданыя отъ Бога и отъ апостолъ и отъ святыхъ отецъ архіереомъ. Възложи нѣкогда Ісусъ Наввинъ возложеніе Господу Богу, и отъ таковаго возложеніа восхити нѣчто Ахаръ, и бысть гнѣвъ Божій на вся люди, и побѣжени бываху отъ враговъ. И растерза Ісусъ Наввинъ ризы своа и паде на землю съ рыданіемъ и плачемъ и со слезами възопи къ Господу Богу. И рече Господь къ нему: согрѣшиша людіе твои, восхитиша отъ возложенныхъ, и не возмогутъ стати предъ лицемъ врагъ твоихъ, дондеже измете отъ васъ самѣхъ восхитившаго возложеніе. И извѣщено бысть, и обрѣтеся. Ахаръ взя отъ возложенныхъ Богови ризу пестру и обручъ златъ и двѣсти дидрахмъ и языкъ златъ. И побиша его каменіемъ со всѣмъ родомъ его. И тако преста гнѣвъ Божій на всѣхъ сынѣхъ Израилевыхъ. Аще быша таковая отмещеніа тогда, множае паче нынѣ подобаетъ боятися. Егда убо святые и божественные безъ пакости немятежно въ мирѣ пребываютъ, тогда намъ вся благая устроеніа отъ Бога бываютъ подаема, миръ и умноженіе плодомъ и врагомъ одолѣніе. Егда же будутъ церкви обидимы и церковныя уставы и законы разоряеми и презираеми: и тогда да слышатъ Исайю велегласно глаголющи къ нимъ: Азъ, рече, предамъ вы въ оружіе и вси заколеніемъ падете, и чада ваша въ гладъ и въ плѣнъ предамъ: яко звахъ васъ и не отзвастеся, и глаголахъ и ослушастеся, повелѣніе Мое отринусте и сътвористе злое предо Мною: ихъ же не хотѣхъ Азъ, вы возлюбисте. Сего ради тако глаголетъ Господь: се работающіи Ми ясти имутъ, вы же вжаждете и взалчете. Се творящіи волю Мою возрадуются зѣло въ веселіи сердца, вы же восплачете и возрыдаете съ болѣзнію сердца, яко остависте законъ Мой, исполнисте волю свою. Тако убо подобаетъ православнымъ царемъ и священнымъ архіереомъ исполняти Божественное повелѣніе и святыхъ апостолъ преданіе и богоносныхъ отець безсоблазненно. Нѣсть бо ино ничтоже, яко же правило церковное крѣпко держати и не преходити предѣлъ святыхъ отецъ своихъ. Сего бо ради мірстіи князи же и люди приразящися ко священнымъ и вземлюще на себе таковая возложеніа Богови или восхищающи таковая священная владѣніа ради славы прелестныя и прибытковъ ради суетныхъ, осужаются Божественными Писаніи и священными правилы въ нынѣшнемъ вѣцѣ и въ будущемъ, яко же глаголетъ Великій Афонасіе и Великій Василіе и божественный Іоаннъ Златоустый, и иніи мнози. Подобаетъ же къ сему благочестнѣ живущимъ и православнѣ вѣрующимъ повѣсти нѣкіа послѣдству на ползу приносити: якоже первозданный [18], не сохранивъ, заповѣди, пострадавъ. Якоже при Аронѣ приразившіися священничеству возложеннымъ Господу Богу освященнымъ вещемъ страшно Божіимъ судомъ мучими быша. Даѳана убо и Авирона и Корреа и иныхъ многыхъ совѣтниковъ ихъ, приразившихся священничеству, овыхъ убо разсѣдшися земля поглоти, овѣхъ же огнь, съ небесе пришедъ, пожже, память тверду будущимъ родомъ устрои. Ахаръ же онъ не явѣ приразися возложеннымъ Богови, и того ради Божіимъ судомъ мученіе страшно пріятъ и со всѣми его сущими. Озія же царь колико многодобродѣтеленъ бѣ, и потомъ разгордѣся и восхотѣ не данная ему взяти, восхотѣ власти священическіа, восхотѣ честѣйши быти, и бысть безчестнѣйшій, восхотѣ богатство священическое, и погуби царство, и страшно Божіимъ судомъ мученіе пріятъ. Озанъ же онъ многодобродѣтельный, единъ отъ преимущихъ и славныхъ и отъ почитаемыхъ первый, видѣвъ кивотъ завѣта Господня, хотящь пáстися, простеръ руку свою, хотя удръжати кіотъ, да не падетъ, и въ той часъ Божіимъ судомъ страшну смерть пріятъ. И аще сей, не корысти ради, но хотя бреженіе сотворити, прикоснуся къ неповелѣннымъ ему, страшно пострада: много наипаче осуженіе пріемлютъ страшно, иже корысти ради и властованіа прикасающеся священнымъ и вземлюще возложенная Богови. Августъ и Тивирій, Гайе, и Клавдіе, и Неронъ, и друзіи мучителіе и царіе, ратовавшіи Святую Церковь и святыя апостолы и святыхъ апостолъ пріемниковъ и наслѣдниковъ не страшно ли осуждены быша и погибоша! И по сихъ Константіе и Галла такожъ возмездіе пріяша злыхъ своихъ. Іюліанъ же царь корысти ради и суетныхъ прибытковъ для приразися священнымъ, страшно отъ Бога осуженъ бысть и злѣй смерти преданъ. Евдоксіа же царица любовластнымъ и корыстнымъ нравомъ приражатеся священнымъ Божіимъ вещемъ и епископы во свою волю нуждаше и устрояюще, такожъ и монастыри и игумены и инокы, таже и къ блаженному Іоанну Златоустому приразися во многихъ священныхъ вещехъ и съвратися въ конечное зло и судъ гнѣва Божіа пріа. Левъ же царь, иже отъ Савріа, и сынъ его, царь Копронимъ, вся епископіа и монастыри во свою власть восхитиста, такожъ и игумени и прочая клирики, сирѣчь причетники и ереси умножидши, погибоша. И по сихъ прочія цари и князи и мучители такожъ сотвориша и погибоша.
Понеже убо святіи апостоли, яко отъ Бога научени суще, не царемъ и княземъ Святыа Церкви и вся правленіа ихъ и вся власти ихъ и съдержаніа предаша. И заповѣдаша имъ твердо съблюдати ихъ, а еже отъ поспѣшества мірскихъ князей и людей пріяти кому священничество и держати церкви, възбраниша и запретиша, якоже писано есть въ завѣщаніи святыхъ апостолъ. Такожъ и въ тридесятомъ правилѣ глаголетъ: аще который епископъ мірскихъ князей помощію пріиметъ церковь, да извержется и отлучится, и вси пріобщающіися ему. Такожъ и Седмаго Собора, иже въ Никѣи второе събравшагося, правило третіе глаголетъ, яко всякому избранію, бываему отъ князей, епископа или прозвитера или діякона, не тверду быти, по канону глаголющему святыхъ апостолъ: аще кто епископъ мірскихъ князей помощію церковную власть получитъ, отъ Церкви отверженъ будетъ и отлученъ и вси пріобщающеися ему. Подобаетъ бо хотящему взыти на епископство, отъ епископьи избрану бывати и поставлятися, якоже отъ святыхъ отець нашихъ, иже въ Никѣи уставлено есть въ каконѣ глаголющемъ: епископу подобаетъ наипаче отъ всѣхъ областныхъ епископовъ поставлятися: аще ли же не возможно будетъ таковое, или находящіа ради нужди, или долготы ради пути, да всяко отнудь тремъ собравшамся вкупѣ и совѣтомъ всѣхъ прочихъ и съ согласными грамотами тогда поставленіе творити. Власть же бываемыхъ дастся въ коейждо области митрополиту, понеже той глава есть и отець и мати всѣмъ иже въ области его сущимъ. Отъ Собора, иже въ Лаодикіи: яко не подобаетъ попущати мірскимъ властемъ и народомъ избраніе творити хотящимъ поставленнымъ быти въ священничество. Вѣсте явѣ, яко Божественными Писаніи и священными правилы воспитани суще, какову подобаетъ быти сподобляемому святительства. Яко не словомъ токмо но и житіемъ подобаетъ устрояти начальствуемыхъ, и всякіа добродѣтели образъ себе предлагати и свидѣтедьство добро имѣти учительству, житіе благо и незазорно. Таковаго убо и нынѣ на архіерейскихъ престолѣхъ посажайте да яко имъ царство управляюще честнѣ ему главы подклоняйте, и радостнѣ ему повиновеніе и послушаніе творите и бываемая отъ него обличеніа, яко врачевное пріимати исцѣленіе. Человѣци бо есмы и страстьми всюду связани бываемъ, и къ грѣху скоро уклонителни. Сего ради отъ священныхъ пастырей должны суть наказаніе и обличеніе пріимати съ радостію и съ многимъ смиреніемъ и благодареніемъ, безо всякаго гнѣва и злопамстства, явѣ вѣдяще, яко по истинѣ сіе есть духовное врачеваніе и исцѣленіе душамъ и тѣлесемъ. Сіа къ священному собору самому царю явѣ изгласивщу, соборъ же моляше его, яко да общекупно со всѣми съ ними совѣтовавъше, избирати достойнаго. Яко многоразумну и премудру сущу царю и добрыхъ дѣлъ исподнену и благовѣріемъ украшену. Царь же рече: больши насъ начинаніе есть: вы убо, о священніи отцы, божественныя благодати сподоблени, и сіаніе оно въ себѣ пріимше, апостольстіи намѣстницы суще: вамъ бо сіе повелѣно есть, яко Богу возложенымъ и Божіа возложеніа устрояющимъ и поставляющимъ, а не намъ міру возложенымъ и мірская устрояющимъ, и благословеніе же и связаніе и разрѣшеніе и прощеніе отъ васъ пріемлющимъ намъ. Сице отъ Бога уставлено есть и утвержено. И кто сице безуменъ, таковая можетъ поколебати и подвигнути, великіа паче инѣхъ, иже въ человѣцѣхъ еста два раба Божіа отъ вышняго дарована человѣколюбіа: священничество и царство. Священничество убо божественнымъ служа и промышляя и пекійся, отъ единого того же начала обоя происходяща, человѣчьское украшаютъ житіе. Яко ничтоже тако поспешеніе бываетъ царству, якоже святительское величество и честь. Сего ради о обоихъ самѣхъ тѣхъ дву началѣхъ Богови молятся. Аще убо они непорочни будутъ во всемъ, и къ Богу имутъ дерзновеніе, и праведно и благоподобно украшати грады начнутъ, и сущая подъ ними будетъ съгласіе, нѣкое благо все иже многая благая человѣчестей даруя жизни [19]. Сему же быти вѣруемъ, аще священныхъ правилъ блюденіе сохранится, ихъ же праведно похваляеміи и покланяеміи самовидцы Божію Слову предаша апостоли, и святіи отцы сохраниша и заповѣдаша.
Златорѣчивый же Иванъ, глаголеть, яко церковь небеси честнѣйши есть. Но хотя показати яко аще и церкви съжижемъ [20] и всяческы украсимъ, грѣхы жъ и страстьми и скверными дѣлы себе оскверняемъ: тогда ни святыхъ церкви, ни своего воображенія, ни Пречистыхъ Таинъ щадитъ Богъ, въ страхъ и цѣломудріе хотя обратити съгрѣшающая. Аще бо святаго ковчега не пощадѣ, но предасть его иноплеменникомъ съ священникы беззаконными. И Соломону глаголеть: аще съхраниши заповѣди Моя, вознесу престолъ твой во Израили во вѣки, аще отвержеши повелѣніа Моя, потреблю Израиля отъ земли, и церковь, юже освятихъ имени Моему, отрину отъ лица Моего. И будетъ на погубленіе и смѣхъ во вся языки, еже и бысть. При Ехоніи и при Седекіи предаде градъ и церковь, и домъ царевъ пожже. Прочая же вся, священіа херувимъ, славы, одежды и пророчествіа, и явленіе и священные сосуды съ людьми возбѣсившимися въ попраніе и оскверненіе отдаде. При Зоровавелѣ жъ и Ісусѣ Оседековѣ и Ездрѣ пакы церковь и градъ создашася. Яко егда людіе съ царемъ развратишася, тогда людіе и церковь въ попраніе и оскверненіе предашася, егда же Зоровавель и иже съ нимъ умилосердиша Божественное, тогда церковь и люди Богомъ наздани бывша. Егда же пакы возвратишася въ скверная дѣла, и паки при Антіосѣ церковь и люди въ попраніе и оскверненіе предашася. И не токмо тогда бысть сіе, но и до конечнаго дни тако творится, якоже въ Старчествѣ писано есть: яко старецъ святъ бѣ въ Іеросалимѣ, видѣ себе въ церкви святаго Христова Въскресеніа. И смраду велику бывшу во церкви, глагола ангелу: откуду исходатъ смрадъ сей, и что не очистиши его? Онъ же глагола: смрадъ сей исходитъ отъ беззаконій церковникъ, живущихъ здѣ, очистити же не мощно сего, но точію огнемъ. И по малѣ пріидоша Перси, церковь и иже въ ней недостойнѣ живущихъ огнемъ пожгоша. Егда же паки отвратишася злобы своея, и умилосердися Господь Богъ и поможе благочестивому царю Ираклію, иже Перси побѣди и церкви раскопанныя пакы созда, яко добрѣ глаголетъ Златоустъ: церкви не стѣны, но народъ благочестивыхъ людей. Подобаетъ убо дѣлы благими Богу угождати и церкви Божественныя созидати, страхомъ же и трепетомъ стояти въ нихъ и почитати Божественная вѣрою и любовію. Аще бо кто обезчеститъ образъ царевъ, главною казнію мучится: кольми паче Небеснаго Царя или святыхъ Его подобнѣ, или церковь кто обезчеститъ, которые муки достоинъ есть. Но по Божественныхъ правилѣхъ и здѣ главною казнью да казнится и проклятію вѣчному предастся; по смерти же съ діяволомъ и съ распеншими Христа Іюдеи, рекшими: кровь Его на насъ и на чадѣхъ нашихъ, во огнь вѣчный осудятся. А иже вѣрою и любовію, страхомъ и трепетомъ, покланяется и почитаетъ всечестныя иконы и Честный и Животворящій Крестъ и Святое Евангеліе и Пречистыя Божія Тайны, и освященныя съсуды, въ нихъ же Божественная Таинства совершаются, и всечестныя святыхъ мощи и Божественныя церкви, въ нынѣшнемъ вѣцѣ, яко добронравіи и блазіи раби добрѣ и благочестнѣ живутъ, въ будущемъ же вѣцѣ блаженный и славный гласъ услышатъ, еже благый рабе и вѣрный, вниди въ радость Господа своего. Подобаетъ намъ всегда въ заповѣдехъ Божественныхъ ходити: не дати злымъ мыслемъ царствовати въ сердцехъ нашихъ. Не будите яко мдаденцы, плавающе порѣваеми всякыми вѣтры, будете въ заповѣдехъ Божіихъ и другъ другу блази и милосерди, якоже возлюби насъ Христосъ. Блуженіе жъ, и нечистоты, и лихоиманіе и всякое злодѣяніе не буди въ васъ. Аки чада свѣту ходите, не примѣшайтеся дѣломъ неподобнымъ, но паче обличайте, все бо обличаемо свѣтъ есть. Жены бы покарялись мужемъ своимъ, аки Богови, яко мужъ глава есть женѣ, якоже Христосъ есть глава Церкви. И мужемъ любити жены своя, якоже и Христосъ возлюби Церковь, тако суть мужи длъжны любити жены своя, аки своя тѣлеса. Чада слушайте родителей своихъ. Раби слушай(те) господій своихъ, да не на васъ збудется реченное пророкомъ: человѣкъ въ чести сый не разумѣ, уподобися скоту не смысленному.
Родъ же Фряжскій, въ Божественныхъ Писаніихъ Германи глаголются, искорениша древняя Римляны языкъ. Избраша же отъ различныхъ ересей и мнящеся, яко премудри, и безуміемъ высокымъ исполнени суще и наполнишася различными ересми. Образу Господню и Богородицыну и святымъ не покланяются, и постятся въ субботу. А святыхъ апостолъ и святыхъ отецъ правила возбраняютъ въ субботу постъ имѣти, точію кромѣ великіе единыя субботы. Якоже сего ради и армени отъ безкваснихъ приносятъ и жидовствуютъ. Латына же безквасная сотворяюще и жидовствуютъ и въ службѣ во время причащенія единъ отъ служащихъ ядый опрѣсноки, а прочихъ цѣлуетъ и глаголетъ, яко Христосъ на вечери безквасная яде. Почто же и не обрѣзуются? Се ложная ихъ ересь. Истина же въ благовѣстіи речена: пріимъ хлѣбъ, даяше ученикомъ. А о опресноцѣ не глаголеть ни Господъ, ни апостоли. И Божественное крещеніе сотворяютъ, въ едино погруженіе крещаютъ, и крещаенымъ уста солію исполняютъ. Аще бескваснымъ причащаемся явѣ, яко еще сѣнь Моѵсейскаго закона держимъ и трапезу жидовскую ямы, а не Божію словесную живую плоть. Не бо есмя подъ закономъ, но подъ благодатію. Нова бо есмя тварь о Христѣ, понеже древняа мимоидоша. О святѣмъ же крещеніи Богомъ узаконено есть и апостоломъ повелѣ: шедше научите вся языки, крестяще я во имя Отца и Сына и Святаго Духа, учаще и блюсти вся, елика заповѣдахъ вамъ. И апостоли возградиша и научиша со многымъ трудомъ. А яко отъ святыхъ Вселенскихъ Соборъ во Святыхъ Тайныхъ жрътвахъ во церквахъ нашихъ воспоминаніе римскаго папы отсѣчено бысть многыхъ ради ересей. А Моамефово бѣсовское ученіе святыми отцы проклято.
Видите, учители, како апостоли трудишася, и како святіи отцы подвизашася, и како о пастусѣхъ словесныхъ овецъ Божіихъ писано, иже млеко и вóлну вземлюще отъ стада, а о овцахъ не пекущеся. Како отвѣтъ имамы дати на судѣ Божіи, и кое слово въздамы Великому Пастуху, рекше(му) пророческими усты: аще нисходящаго въ ровъ грѣховный не извлечеши, кровь его отъ руки твоея взыщу. Подобаетъ убо епископу быти яко Божію приставнику, не себѣ угожающе, пособствующе по вѣрнемъ словеси въ здравемъ ученіи, и противныхъ вѣрѣ обличати. Пастырь добрый душу свою полагаетъ за овцы, а иже есть наимникъ, а не пастырь, ему же не суть овца своа, аще видитъ волка грядуща, то бѣжитъ отъ овецъ; расхититъ я и распудитъ овецъ. Видите, откуду исходятъ волцы и зміи, пси, еретичьская ученіа: не отъ лѣности ли и грубости пастушьски? Откуду ли разбойницы и татіе, грѣси и неправды, не отъ ненаказаніа ли епископьска? Паки глаголю: пастуси, блюдите стада, порученаго вамъ, учите кротостію и наказуйте съ любовію. Слышите Господне благовѣстіе: и ины овцы (имамъ), яже не суть отъ двора сего, но и тѣхъ подобаетъ привести ми, да не на насъ збудется реченное: о горе вамъ вожеве слѣпіи, яко затворяете Царствіе Божіе предъ человѣкы, ни сами въходяще, ни иному дасте внити. Внемлите пастушьскія старѣйшины: подражайте святымъ отцамъ, не почивайте, учаще порученныя вамъ люди. И не погребайте таланта въ тицахъ, и не скрыйте бисера Господня въ піянствѣ. Разумѣйте: рабъ онъ, пріемъ сребреникъ единъ, и того не погуби и принесе господеви и рече: убояхся тебѣ, яко яръ еси, жнеши идѣже не сѣявъ, събираеши, удуже и не расточивъ; и рече рабу: почто убо не дадяше сребра моего купцемъ, да быхъ пришелъ взялъ свое съ прибыткомъ. Послушайте, пастуси, страшнаго онаго отвѣта: и не погубивый сребреника Господня кольми мученъ будетъ. Видите, архіепископи и епископи, попове и діакони, дѣлатели непостыдніи, правяще слово исьтинное, вводяще ко спасенію. Святители земніи, серафими плотяни небесніи, священноначальницы, послѣдуйте заповѣди первому Пастырю, Священноначальнику, Архіерею и Учителю Христу, Спасителю нашему и апостоломъ Его и святымъ отцемъ и святымъ седми Соборомъ Вселенскимъ, еже поспѣшити и направити ноги наша на путь заповѣдей Господнихъ. Помяните прьваго человѣка Адама, рукою Божіею създана. И отъ Бога наречется господинъ на земли, Богомъ почтенъ и въ рай введенъ, Богу собесѣдникъ бысть. Едину заповѣдь преступивъ и многа блага лишися, толикіа чести и славы царствіа и всѣхъ благыхъ даровъ. Видите Владычне милосердіе на не хранящихъ заповѣди непощаженіе, а на сотворшихъ милость. Послушайте верховнаго апостола Петра, како васъ учитъ: пасите, еже въ васъ стадо Божіе, не нужею, но волею, ни мздою, но любовію. Подражайте плодящая винограды, како тіи бдять день и нощь округъ ходяще, плещуще и кричуще, не дадуще ни звѣрю, ни татю, ни птицамъ озобати винограда. Тако и вы творите учители, да не дивій вепрь діяволъ озобяетъ Господня винограда. Аще и молитвы продлъжающе, а обидимыхъ сиротъ не исторгнуще отъ печали, вся та мрьзка суть. Стенаніа бо и слезы убогихъ и безъ правды стражущихъ кровь наричютъ книги. Се же вся видящи предъ очима нашима пастуси, что обѣща Господь добрымъ и злымъ и кацѣмъ образомъ лѣпо быти. Подражайте бывшихъ преже васъ святыхъ отецъ, ихъ же имена помявувше боятся бѣси. Не рцы никтоже: не мощно есть вся лѣта такому быти, бѣша святіи велицы и крѣпцы и лѣта ихъ добра. Нынѣ же зла насташа. Христолюбцы, не помышляйте и не глаголите сего, Той бо бывый Богъ и тогда и нынѣ Той же есть и во вѣки на всѣхъ мѣстѣхъ милуетъ призывающихъ Его.
Святительству твоему благодать и благословеніе и всему освященному собору и съ твоею паствою православною и христоименитымъ людемъ. Соблюдайте порученіе и обѣты и отъ діявола отврьженіе, и ко Христу обѣщаніе, да цѣломудреннѣ и праведнѣ и благочестнѣ живемъ въ нынѣшнемъ вѣцѣ, ждуще блаженныя надежди и явленіе славы великаго Бога Спасителя нашего Ісуса Христа. Поминайте же мя присно, и держите заповѣди, яже пріясте блаженныхъ мужъ, пророкъ, апостолъ и святыхъ отецъ, и Владыки всѣхъ. Слышите Владычне человѣколюбіе, глаголюще: небо и земля преити имать, а словеса Моа не имутъ преити. Единою кляхся святымъ Моимъ: не хощу смерти грѣшникомъ, да того ради и азъ васъ позываю: идите, чада, послушайте мене, дондеже время имамы, варимъ лице Его исповѣданіемъ. Пойдемъ, поклонимся предъ Господемъ, сотворшимъ ны, яко Той есть Богъ нашъ, просвѣтитъ лице Свое на ны и помилуетъ ны, Той бо есть Богъ кающихся, Той насъ имать спасти въ вѣкы вся, Тому слава и дръжава и всяка похвала и поклоненіе Отцю и Сыну и Святому Духу, нынѣ и присно и во вѣкы вѣкомъ, аминь.
Примѣчанія:
[1] Посланіе печатается по рукописному сборнику XVII в. Новгородской Софійской библиотеки (№ 1475).
[2] Въ рук. неизрѣченнаго.
[3] Въ рук. преставляемыхъ.
[4] «Части и жребія Богородици». Извѣстно преданіе Восточной Церкви, записанное Стефаномъ Святогорцемъ, что когда, по Вознесеніи Ісуса Христа на небо, апостолы, вмѣстѣ съ Богоматерью, собрались въ Сіонской горницѣ ожидать обѣтованнаго Утѣшителя, то при этомъ «метнуша жребіи, которая коемуждо отъ нихъ страна будетъ, еже бы тамо проповѣдати Евангеліе. Рече же Пресвятая: хощу и Азъ съ вами метнути жребій... и паде ей жребіемъ Иверская земля... Ангелъ же Божій рече: не отлучайся Іеросалима, жребій же твой просвѣтится въ послѣдняя дни...» (Четіи-Минеи, подъ 15 августа).
[5] Карамзинъ, между посланными царя Александра, вмѣсто Каплана называетъ священника Іоакима (т. X, прим. 114).
[6] По другимъ указаніямъ, кромѣ бывшаго казначея Троицкой Лавры Закхея, отправлены были іеромонахъ Лавры Іероѳей, Чудова монастыря діаконъ Ѳеодосій, да иконописцы Успенскій священникъ Богданъ, архангельскій священникъ Димитрій и діаконъ Ѳеодоръ. См. Исторію Рус. Церкви пр. Филарета, періодъ 4, стр. 60; откуда пр. Филаретъ ваимствовалъ эти свѣдѣнія — неизвѣстно, такъ какъ ни у Карамзина, ни у Іосселіани, которыхъ онъ цитуетъ, объ упоминаемыхъ лицахъ ничего не говорится.
[7] Вся убо заповѣди... Съ этихъ поръ начинаются выдержки изъ слова пресвитера Космы, отчасти буквальныя, отчасти съ пропусками, съ незначительнымъ перифразомъ и небольшими вставками. Сличи «Православный Собесѣдникъ», 1864 г. апрѣль, май, іюнь.
[8] Вѣроятно слѣдуетъ читать: но видѣвъ, яко всѣ ти грѣси не суть точни ереси и пр.
[9] Обиноваться — сомнѣваться, опускать.
[10] Мотыло — навозъ, пометъ.
[11] Комканіе — Святая Евхаристія, вѣроятно отъ лат. communіcatіo; cлово, часто встрѣчающееся въ древнихъ паматникахъ.
[12] До этаго мѣста — выдержки изъ Козьмы.
[13] Это мѣсто начиная со словъ: иже не любитъ Господа Ісуса... взято, съ незначительнымъ пропусками изъ слова Козмы см. «Православный Собесѣдникъ», 1864 г. т. 2, стр. 324.
[14] См. там же слово Козьмы, т. 2, стр. 99.
[15] По обѣщанію?
[16] Вѣроятно слѣдуетъ читать: «апостольскимъ».
[17] Въ рук. не ангелъ.
[18] Въ рукописи ошибочно: первозванный.
[19] Подлинный текстъ посланія здѣсь очевидно испорченъ переписчикомъ.
[20] Созиждемъ.
Источникъ: Изъ неизданныхъ памятниковъ Древней Русской литературы. Посланіе Патріарха Іова къ Грузинскому Митрополиту Николаю. // Журналъ «Христіанское чтеніе, издаваемое при Санктпетербургской Духовной Академіи». — 1869 г. — Часть II. — С. 867-893.
Customer Feedback (0)