Послание к собору, бывшему в Москове в лето 6998 [1490 г.].

Свт. Геннадiй Новгородскiй († 1504 г.)

Посланіе къ собору, бывшему въ Московѣ въ лѣто 6998 [1490 г.].

Святѣйшимъ боголюбивымъ братіи нашей архіепискупомъ: Тихону архіепископу Ростовскому и Ярославскому, Ниѳонту епископу Суздалскому и Туровскому, Васьяну епископу Тверьскому, Прохору епископу Сарскому и Подонскому, Филоѳею епископу Пермскому [1]. О семъ вамъ воспоминаю, братіи нашей: прислалъ князь великій ко мнѣ грамоту, а митрополитъ другую о поставленіи коломенскаго владыки, а безъимянно кого. А велятъ ми отпись дати безъимянно же такову, какову Геронтію митрополиту взяли у мене. Да прислалъ ко мнѣ митрополитъ и списки съ тѣхъ грамотъ, а язъ не далъ таковой отписи [2], да о томъ есми отписалъ къ великому князю да и митрополиту, а вамъ то, братіи нашей, вѣдомо же будетъ, какъ митрополитъ велитъ честѝ ту грамоту предъ вами. А о коломенскомъ владыцѣ, да и о инѣхъ, коли прилучитца, посылали бы ко мнѣ именно, кого ставити. И язъ отписи даю такіе законные, какіе иные братья наша давали. А не изпѣшили бы есте еще ставити владыки: преже бы есте стали накрѣпко о томъ, чтобъ еретиковъ обыскали накрѣпко, да тѣхъ бы князь великій велѣлъ казнити. А Захаръ чернецъ пишетъ въ своихъ грамотахъ, что на мене послалъ по всѣмъ градомъ грамоты: зоветъ мя еретикомъ, а язъ не еретикъ. А и писано: «аще тя кто назоветъ еретикомъ, да не пріимеши; аще ли пріалъ еси, отвергъся есть Христа». И язъ съ его грамоты къ вамъ списокъ послалъ. А по Захара есми посылалъ того для: жаловалися мнѣ на него черньцы: перестриглъ ихъ отъ князя Федора отъ Бѣлскаго, да причастья три годы не давалъ, а самъ деи не причащалжеся. И какъ язъ его призвалъ, да почалъ его спрашивати: «о чемъ ты тако чиниши, что есь самъ три годы не причащался» ? И онъ ми молвилъ: «грѣшенъ есми». И язъ ему молвилъ: «о чемъ же ты перестриглъ дѣтей боярскихъ, да и отъ государя еси ихъ отвелъ, а отъ Бога отлучилъ, что есь и причастья не далъ три годы»? И онъ ту свою ересь явилъ: «у кого де ся причащати? Попы деи по мздѣ ставлены, а митрополитъ деи владыки по мздѣ ставитъ». И язъ молвилъ: «а се митрополита ставятъ не по мздѣ». И онъ молвилъ: «коли деи въ Царьградъ ходилъ митрополитъ ставитися, и онъ деи патріарху дань давалъ, а нынѣ деи онъ бояромъ посулы даетъ тайно, а владыки деи митрополиту даютъ деньги: ино деи у кого причащатися»? И язъ позналъ, что стригалникъ еретикъ.

Примѣчанiя:

[1] По лѣтописнымъ сказаніямъ, на соборѣ присутствовалъ еще Симеонъ Рязанскій, упоминаемый послѣ Ниѳонта Суздальскаго. Полн. Собр. Лѣтоп., т. IV, стр. 158.

[2] Это обстоятельство замѣчено и въ лѣтописяхъ: «тое же осени, ноября 18, въ четвертокъ, поставленъ бысть епископъ Коломнѣ Аврамей, игуменъ Угрѣшскый, ...а Ноугородцкыи архіепископъ Генадеи грамоты своея полныя не прислалъ на его паставленіе». Тамъ же, стр. 159.

Печатается по изданiю: Памятники Древле-Русской духовной письменности: Посланіе Геннадія, архіепископа Новгородскаго, къ Московскому собору 1490 года. // Журналъ «Православный собесѣдникъ», Казань. – 1863 г. – Книга I. – с. 479-481.