Свт. Кириллъ Ростовскiй († 1262 г.)
Слово о первозданнемъ.
Созда Богъ преже Адама отъ земля. и отъ его же ребра жену ему созда. душу има изъ себѣ вдохну. и введе ѝ въ рай пищный. заповѣди има преда. сатана же взавидѣ Адаму. дабы его соблазнилъ. да быста заповѣдь Божію преступили. якоже и самъ. и не можаше Адама діяволъ прельстити. но Евву прельсти и соблазни ю. а Евва Адама прельсти. и быста изъ рая изгнана. и во смерть осужена. въ скорби и печали быста велицѣ. землю осужена дѣлати. и въ печали дѣти родиста. и отъ сихъ міръ сей наполнися. устави же Богъ рокъ человѣкомъ житію на земли 7000 лѣтъ. и что ся. ихъ въ ту 7000 лѣтъ изберетъ во святыя по закону Божію жившихъ. тѣми ангельскій чинъ спадшій исполняетъ. и аще кто согрѣшитъ что. покаяніе положилъ. и аще кто истинѣ покается. пріиметъ пакы его Богъ. ащели согрѣшивъ кто злобъ ся не останетъ и не кается. таковіи будутъ съ бѣсы осужени въ вѣчную муку. сего бо дѣля діяволъ вельми завидитъ роду человѣчю. и не останетъ прельщая. овы прельсти въ тварь вѣровати и въ солнце же и въ огонь. и во источникы же и въ древа. и во ины различны вещи. ихъже рещи не возможно. да яко самъ отпаде отъ Бога. тако и насъ льститъ. дабы ему не единому въ негасимомъ огни быти. и завистію многы человѣкы отъ Бога отлучилъ. первый міръ водою за грѣхи Богъ потопи. единаго токмо Ноя праведнаго соблюде, съ женою и съ тремя сыны и съ женами ихъ. а Содома и Гомора и околняя грады каменіемъ огненнымъ и пламенемъ погуби я. а праведнаго Лота отъ смерти избави. и двѣ его дщери. израильтяны же отъ работы фараоня Моисеомъ изведе и многа сотвори въ нихъ чюдеса. манною и крастели кормя. и воду имъ изъ камени въ пустыни изведе. моремъ ихъ проведе яко посуху. а фараона въ немъ погрузи. и за 40 лѣтъ ни сапози ни ризы не издрашеся. и потомъ всея забыша благодати Божія и чюдесе Его. и ставше играти и начаша плясаніемь. и въ томъ часѣ раступлься земля и пожре ихъ 2 тмы и 3000. се образъ муки согрѣшающимь явѣ. иже не каются. посемъ видѣ Творець Господь родъ человѣчь отъ діявола мучимъ. и посла первіе пророки проповѣдати вочеловѣченіе Господне. по семъ благовѣстити посла архангела Гавріила въ градъ Назаретъ къ Дѣвѣ Маріи зачатіе и рожество отъ Святаго Духа безъ сѣмени на спасеніе человѣкомъ. и пріемъ плоть отъ Дѣвы Господь бысть человѣкъ и Богъ. и вся претерпѣ нашего ради спасенія. и на земли поживе. и страсти мнози пріятъ отъ твари Своея и за ланиту ударенъ и поруганъ и заплеванъ и тростію по главѣ біенъ. и отъ тернія вѣнецъ возложиша нань. мняше бо діяволъ человѣка его а не Бога. того ради нань жиды научи. они же вѣдуще Господа завистію распяша ѝ. желчи и óцта напоиша. и копіемъ ребра Ему прободоша. смерть прія яко человѣкъ. но воскресъ яко Богъ. и вознесеся на небо. Тойже паки пріидетъ судити живымъ и мертвымъ, живыя мнитъ праведники. а мертвыя грѣшники наричетъ.
Печатается по изданiю: Памятники Древле-Русской духовной письменности: Поученія Кирилла, епископа Ростовскаго (XIII вѣка). // Журналъ «Православный собесѣдникъ», Казань. – 1859 г. – Книга I. – с. 256-258.
Customer Feedback (0)