Iером. Епифаній Премудрый († ок. 1420 г.)
Посланіе къ преподобному Кирилу Бѣлоезерскому, 1413 года. [1]
Юже нѣкогда видѣлъ еси церковь Софійскую цареградскую, написану въ моей книгѣ во евангеліи, еже гречески речется тетроевангеліе, нашимъ русскимъ языкомъ зовется четвероблаговѣстіе: прилучижеся таковому граду списати въ нашей книзѣ сицевымъ образомъ. Понеже егда живяхъ на Москвѣ, идѣже бяше тамо мужъ онъ живый, преславный мудрокъ, зѣло философъ хитръ Ѳеофанъ гречинъ, книги изографъ нарочитый и живописецъ изящный во иконописцѣхъ, иже многи различные множае четверодесяточисленныхъ церквей каменныхъ своего подписалъ рукою, яже по градомъ, елико въ Константинѣ градѣ, и въ Халкидонѣ, и въ Галаѳѣ, и въ Каѳѣ, и въ велицѣмъ Новѣгородѣ, и въ Нижнемъ. Но на Москвѣ три церкви подписаны: Благовѣщенія Святыя Богородицы, Михáйло святый, одну же на Москвѣ [2]. Въ Михáйлѣ святомъ на стѣнѣ написа градъ, во градцѣ шаровидно подробну написавый; у князя Владиміра Андреевича въ каменѣ стѣнѣ саму Москву такоже написавый; теремъ у князя великого незнаемою подписью и страннолѣпно подписавый [3]; и въ каменной церкви во святомъ Благовѣщеніи корень Іессеевъ и Апокалипсій такоже исписавый. Сія же вся егда назнаменующу ему или пишущу, никогдаже нигдѣже на образцы видяще [4] его когда взирающа, якоже нѣцыи наши творятъ иконописцы, иже недоумѣнія наполнишася присно приницающе, очима мещуще сѣмо и овамо, не толма образующе шарми, елико нудяхуся на образъ часто взирающе; но мняшеся, яко иному пишущу, рукама убо изобразуя писаше, ногама же безъ покоя стояше, языкомъ же бесѣдуя съ приходящими глаголаше, а умомъ дальная и разумная обгадываше; чувственныма бо очима разумныма разумную видяше доброту си. Упредивленный мужъ и пресловущій великую къ моей худости любовь имѣяше; тако и азъ уничиженный къ нему и неразсудный дерзновеніе множае стяжахъ, учащахъ на бесѣду къ нему, любяхъ бо присно съ нимъ бесѣдовати. Аще бо кто или вмалѣ или намнозѣ сотворитъ съ нимъ бесѣду, то не мощно еже не почудитися разуму и притчамъ его и хитростному строенію. Азъ видя себе отъ него любима и неоскорбляема, и примѣсихъ къ дерзости безстудство, и понудихъ его рекій: «прошу у твоего мудролюбія, да ми шарми накартаеши изображеніе великія оноя церкви святыя Софіи, иже во Царѣградѣ, юже великій Іустиніанъ царь воздвиже, ротуяся [5] и уподобився премудрому Соломону; еяже качество и величество нѣцыи повѣдаша яко московскій кремль внутреградія и округъ коло ея и основаніе и еже обходиши округъ ея; въ нюже аще страненъ внидетъ безъ проводника, безъ заблуженія не мощѝ ему вонъ излести, аще и зѣло мудръ быти мнится, множества ради столпотворенія и околостолпія, сходовъ и восходовъ, преводовъ и преходовъ, и различныхь полатъ, и церквей, и лѣствицъ, и хранильницъ, и гробницъ, и многоименитыхъ преградъ и предѣлъ, и оконъ, и путей, и дверей, влазовъ же и излазовъ, и столповъ каменныхъ вкупѣ. Напиши ми [6] нарицаемаго Іустиніана на конѣ сѣдяща и въ руцѣ своей десницы мѣдяно держаща яблоко, емуже рекоша величество и мѣра — полтретья ведра воды вливаются. И сія вся предиреченная на листѣ книжнѣмъ напиши ми, да въ главизнѣ книжной положу и въ начало поставлю ѝ, донелиже поминая твое рукописаніе и на таковый храмъ взирая, аки во Царѣградѣ стояще мнимъ». Онъ же мудръ мудрѣ и отвѣща ми: «не мощно есть, рече, того ни тебѣ улучити, ни мнѣ написати; но обаче докуки твоея ради мало нѣчто аки отъ части вписую ти; и тоже не яко отъ части, но яко отъ сотыя части, аки отъ многа мало, да отъ сего маловиднаго изображеннаго пишемаго нами и прочая большая имаши навыцати и разумѣти». То рекъ, дерзостнѣ вземъ кисть и листъ, и написа наскорѣ храмовидное изображеніе по образу сущія церкви во Царѣградѣ, и вдаде ми. Отъ того листа нужда бысть и прочіимъ иконописцемъ московскимъ, яко мнози бяху у когождо преписующе себѣ, другъ предъ другомъ ретующе и отъ друга пріемлюще. Послѣди же всѣхъ изволися и мнѣ, аки изографу, написати четверообразнѣ; поставихомъ таковый храмъ въ моей книзѣ въ четырехъ мѣстѣхъ: 1-е въ началѣ книги въ Матѳеевѣ евангеліи, идѣже столпъ Іустиніана, идѣже Матѳея евангелиста образъ бѣ; 2-й же храмъ въ началѣ Марка евангелиста; 3-й же предъ началомъ Луки евангелиста; 4-й же внегда начатися Іоаннову благовѣстію, — 4 храмы — 4 евангелиста написашася, иже нѣкогда видѣлъ есть [7], внегда бѣжахъ отъ лица Едегеева на Тверь, устрашихся [8], паче же всѣхъ у тебе преупокоихъ претруженіе мое, и тебѣ возвѣстихъ печаль мою, и тебѣ явствовахъ все книжіе мое, елицы отъ разсѣянія и отъ расточенія осташася у мене. Ты же тогда таковый храмъ написанный видѣлъ, и за 6 лѣтъ воспомянулъ ми въ мивувшую зиму сію своимъ благоутробіемъ. О сихъ доздѣ. Аминь.
Примѣчанiя:
[1] По указаніямъ въ этомъ посланіи на историческія личности — Едигея, сдѣлавшаго нашествіе на Москву въ 1408 году, и князя Владиміра Андреевича (Храбраго — умер. 1410 г.), утвердительно дóлжно сказать, что его писалъ Епифаній «Премудрый» (ум. около 1420 г.), ученикъ преподобнаго Сергія Радонежскаго, къ преподобному Кириллу, основателю и игумену бѣлозерскаго монастыря (ум. 1427 г.). Въ посланіи разсказанъ и поводъ къ написанію его. Когда Епифаній бѣжалъ отъ нашествія Едигеева и укрылся въ монастырѣ пр. Кирилла, послѣдній видѣлъ въ принадлежавшемъ ему евангеліи изображеніе цареградскаго храма св. Софіи. Чрезъ 6 лѣтъ преп. Кириллъ, неизвѣстно по какому побужденію, спрашивалъ Епифанія, откуда онъ взялъ это изображеніе, и Епифаній въ посланіи къ нему разсказалъ исторію изображенія. Посланіе знакомитъ насъ съ «хитрымъ философомъ и живописцемъ изящнымъ» грекомъ Ѳеофаномъ; есть въ немъ любопытныя черты для исторіи иконописи въ то время и для характеристики самого ревнителя просвѣщенія Епифанія. Между прочимъ изъ этого посланія мы узнаемъ, что Епифаній путешествовалъ на Востокъ уже послѣ 1415 года; потому что въ посланіи онъ не говоритъ, что самъ видѣлъ цареградскую церковь св. Софіи, а передаетъ преувеличенное описаніе ея, ходившее въ устныхъ разсказахъ на Руси и подтвержденное самимъ Ѳеофаномъ. Посланіе взято изъ сборника академической, бывшей соловецкой, библіотеки № 15; къ сожалѣнію, списокъ его несовсѣмъ исправенъ.
[2] Т. е. и еще одну на Москвѣ росписалъ.
[3] Въ рукописи неправильно: «подписаны».
[4] видѣша.
[5] ретуяся? — см. ниже.
[6] въ рукописи неправильно: «написами».
[7] видѣлъ еси.
[8] устрашився.
Печатается по изданію: Памятники Древле-Русской духовной письменности: Посланіе Епифанія къ преподобному Кирилу — 1413 г. // Журналъ «Православный собесѣдникъ», Казань. – 1863 г. – Книга III. – с. 323-328.
Customer Feedback (0)