Преп. Исаакъ Сиринъ († VII в.)
Слова духовно-подвижническія.
(Въ переводѣ преп. Паисія Величковскаго; М., 1854 г.).
Краткое сказаніе о святомъ Исаацѣ.
Преподобный Исаакъ родомъ бѣ отъ Сиріи. Отечество его, Ниневія; родители его бяху неизвѣстни и ни по чемуже знаеми. Еще юнъ сый зѣло, остави міръ и яже въ мірѣ, и отъиде купно съ братомъ своимъ по плоти въ монастырь, иже именовался Мар-Матѳеа Святаго, идѣже мнози, суще въ тѣлеси, Ангельское провождаху житіе. Въ монастыри убо семъ пріимъ монашескій образъ, начатъ жити, якоже приличествоваше монаху. И егда здѣ навыче добрѣ подвигомъ монашескимъ, и въ довольную пріиде мѣру добродѣтели, вожделѣ глубочайшаго безмолвія, и возгорѣся сердцемъ къ пустыннымъ подвигомъ. Сего ради оставивъ общежитіе, удалися въ пустынную келлію, и начать жительствовати вельми уединенно и отлученно отъ всѣхъ, себѣ единому и Богу внимая. Братъ же его по плоти, пріимъ начальство лавры, убѣждаше его усильными прошеніи чрезъ посланія, да оставивъ пустыню, возвратится паки въ преждній монастырь; онъ же крѣпцѣ любя уединеніе, никако же хотяше оставити пустыню. Но къ чесому не принуди его братнее моленіе, то Божественное откровеніе возможе совершити. Святый бо Исаакъ, аще и не повинуся брату своему, нудившему его пріяти Священство, но не можаше воспротивитися призывающу его свыше Небесному Отцу, пріяти Архіерейское поставленіе и кормило Ниневійскія Церкве. И тако Св. Исаакъ оставляетъ пустыню, юже сердце его зѣльно любяше, и поставляется Епископомъ великому граду Ниневіи: не подобаше бо свѣтильнику скровенну быти подъ спудомъ пустыни, но паче свѣтити на пастырскомъ свѣщницѣ, изливая лучезарный свѣтъ добродѣтели. Обаче бысть сіе зѣло на краткое время; едва бо увидѣша (Ниневитянѣ) свѣтъ возсіявшимъ, и абіе паки сокрыся: міръ бо сей не бѣ достоинъ толикаго мужа, иже подобно Божественному Григорію Богослову, во время рукоположенія, помышляше о бѣгствѣ. Аще бо сіе, являя непреклонность воли, и не мнится приличествовати Святымъ мужемъ, обаче да никтоже дерзнетъ порицати изъ за сіе; понеже мужи сіи во всемъ иномъ бяху безпорочны и Духоносны; духовный востязуетъ вся, самъ же ни отъ единаго востязуется. (1 Кор. 2, 15). Вина, ея же ради возвратися Святый паки въ пустыню, бысть сія. Въ самый той день, въ оньже пріялъ есть рукоположеніе въ Епископа и сѣдяше въ Епископстѣмъ домѣ, пріидоша къ нему два нѣкія человѣка (заимодавецъ и должникъ): первый требоваша долгъ, другій же, аще и не отрацашеся долга, обаче малое время пождати просяше; но заимодавецъ рече: аще сей укоснитъ возвратити мнѣ, имъ же долженъ есть, то азъ абіе предамъ его судіи. Къ нему же Божественный Исаакъ отвѣща: по заповѣди Св. Евангелія ниже взятаго истязовати долженъ еси, то кольми паче подобаше тебѣ нѣкое время пождати на семъ, хотящемъ возвратити твоя. На что оный жестокій возъотвѣща: нынѣ остави твое Евангеліе. Сего ради Св. Исаакъ глагола: аще сіи не покаряются Евангельскимъ заповѣдямъ Господа, то что здѣ имамъ творити. Воспоминая же и прежднее тихое и безмятежное житіе, бывшее въ безмолвіи, и соравняя оное съ молвою и тяжкимъ бременемъ Епископскаго правленія, остави престолъ свой и возвратися въ пустыню къ любимому ему безмолвію, идѣже до самыя кончины своея пребысть, противу бѣсовъ и плоти подвизаяся, и единъ сый, прилежаше о добродѣтели, яже отъ жительства дѣянія и видѣнія составляется и къ единому простираяся души совершенству. Коликія же еще въ жизни сподобися благодати, отъ писаній сего Святаго явственно мощно естъ зрѣти. Обаче удалився въ пустыню, и бѣгая сопребыванія человѣкъ, не преставаше зѣльною любовію любити возлюбленники своя, присно изливая отъ пустыни обильную и живоносную струю ученія, еюже сладцѣ напаяше души собратій; не точію бо учитель и пѣстунъ всѣхъ монаховъ бяше (Св. Исаакъ), но и пристанищемъ спасенія всѣхъ; якоже самъ глаголетъ: «Сія есть любы истинная, яже не можетъ утерпѣти въ нѣкоей тайнѣ отъ возлюбленныхъ своихъ» (Слово 38).
О времени, въ немъ же живяше Святый Исаакъ, мнѣнія нѣколико несогласна: обаче достовѣрнѣйшее есть сіе, яко онъ бѣше въ концѣ пятого вѣка, еже явствуетъ отъ тридесятаго его слова (по Греч. книгѣ 33), идѣже Святый о лютости бѣсовъ духовной брани глаголетъ тако: «сопротивъ бо сихъ имущихъ шесть тысящъ лѣтъ вводиши себе узаконити». Явно убо яко Святый Исаакъ писаше сіе въ началѣ седмой тысящи лѣтъ отъ созданія міра, сиричь около 500 года по рождествѣ Христовѣ.
Нѣцыи отъ нашихъ древнихъ Святыхъ въ Россіи многократно свидѣтельствуются изреченіями св. Исаака, яко святыми и истиннѣйшими, а именно: Преподобный Нилъ Сорский въ Уставѣ своемъ Скитскаго монашескаго жительства (изд. въ Москвѣ 1849 года, стр. 22, 28, 46, 50, 53, 55, 58, 67, 77. и проч.).
Корнилій Комельскій въ своемъ Общежительномъ Уставѣ, зри Истор. церк. Іерархіи часть 4, стр. 631, 692.
Іосифъ Волоколамскій въ своей Духовной Грамотѣ. Глав. 2, ч. 3, глав. 9, ч. 12.
Источникъ: Святаго отца нашего Исаака Сирина, Епископа бывшаго Ниневійскаго, Слова духовно-подвижническiя, переведенныя съ греческаго Старцемъ Паѵсіемъ Пеличковскимъ. — Изданіе Козельской Введенской Оптиной Пустыни. — М.: Въ Университетской Типографiи, 1854. — С. XVII-XX.
Customer Feedback (0)