Акафист Нифонту, еп. Констанции, града Кипрскаго
Кондак 1
Избранный Христом Сыном Божиим на прославление неизреченнаго Его милосердия к кающимся грешником, сподобльшийся ходатайства и заступления Пресвятыя Девы Богородицы, приими от нас, недостойных, восхваление:
Радуйся, отче Нифонте достоблаженный!
Икос 1
Ангел Хранитель, приставленный от Бога на хранение души, возрадовася о твоем обращении от тимения страстей на путь добродетельнаго жития, и с ним вси cвятии Ангели, по неложному словеси Христову: «яко велия радость бывает на Небеси о едином грешнице кающемся». Сего ради и мы, грешнии, радующеся о несказанном благоутробии Божием, похвальная восписуем ти, отче наш Нифонте, сице:
Радуйся, неизреченное милосердие Божие к кающимся грешником познавший;
Радуйся, и нам, грешным, образ покаяния собою подавший.
Радуйся, Споручницу спасения, Матерь Божию, стяжавший;
Радуйся, по Апостолу: «позор Ангелом и человеком бывший» .
Радуйся, из глубины рова страстей изшедший;
Радуйся, ко спасительному покаянию прибегший.
Радуйся, тину от умных очес отрясший;
Радуйся, ко свету благодати Божией прозревший.
Радуйся, зловония смрадных дел греховных избегший;
Радуйся, обоняние Христова благоухания вкусивший.
Радуйся, радость Ангелом сотворивший;
Радуйся, сатану до конца посрамивший.
Радуйся, отче Нифонте достоблаженный!
Кондак 2
Видяще, преподобне отче Нифонте, величие милосердия Божия к кающимся грешником, на тебе cовершившееся, и мы, грешнии и недостойнии, дерзаем взывати к Спасителю Богу: Аллилуия!
Икос 2
Разум лжеименный, во еже в мирских сластех влатися, отвергл еси, отче Нифонте, разум же благий, во еже последовати доброму совету мирскаго друга твоего, Никодима, восприял еси, егда он, на тя со ужасом взирая, сказа тебе: «Яко лице твое, аки мурин черно, от внутренних страстей являшеся». Ты же, о сем усрамився, в познание самого себе прииде. Того ради взываем к тебе таковая:
Радуйся, добраго друга в Никодиме обретший;
Радуйся увещание его смиренно приявший.
Радуйся, обличение тебе в лице незлобиво и кротко послушавый;
Радуйся обличения сего усрамивыйся.
Радуйся, оставити погибельное во страстех житие помысливший;
Радуйся, всепагубную лесть мира сего уразумевый.
Радуйся, всю развращенную жизнь пред умными очесы твоими представивый;
Радуйся, «начало Премудрости — Страх Господень» в сердце твоем приемший.
Радуйся, вся красная мира сего, яко уметы вменивый;
Радуйся, начало обращения к Богу положивый.
Радуйся, вся страсти мирския омерзивший;
Радуйся, к покаянию усердно прибегший.
Радуйся, отче Нифонте достоблаженный!
Кондак 3
Сила Вышняго осени тя, отче Нифонте, лучею благодати озарив сердце твое, во еже прибегнути к молитве. Ты же, противоборствуя злым помыслом, глаголаше в себе: «Егда живях блудно, никое же зло срете мя, ныне же, егда хощу к Богу обратитися, кое зло пострадати имам». Тем же, таковому твоему любомудрию удивляющеся, из глубины души взываем к Богу: Аллилуия!
Икос 3
Имуще богоприятную мысль обратитися к Богу, вшел еси во внутреннюю храмину свою, к стенанию и плачу обратился еси. Того ради сице тебе вопити дерзаем:
Радуйся, во внутренней храмине телом затворивыйся;
Радуйся, внутреннюю глубину сердца твоего к покаянию отверзый.
Радуйся, восхождение в сердце твоем к Богу полагавший;
Радуйся, с мытарем в перси своя биявший.
Радуйся, «множество содеянных лютых помышлявший»;
Радуйся, яко нестерпиме гнев Божий, еже на грешники нераскаянные размышлявший.
Радуйся, яко страшно есть, еже впасти в руце Бога Живаго вразумивший;
Радуйся об ответе на Страшном Суде Христове тогда во уме приведший.
Радуйся, слезные токи от очей излиявший;
Радуйся, Давидски постелю слезами своими омочивший.
Радуйся, стенания из глубины души испущавший;
Радуйся, воздыхании сердечными Бога на милость к себе приклонивший.
Радуйся, отче Нифонте достоблаженный!
Кондак 4
Буря зельная нападений бесовских объят тя, отче Нифонте, ты же, яко адамант твердый, в терпении твоем пребывал еси, крепко вопия к Создателю Богу: Аллилуия!
Икос 4
Слышаще внутренний помысл, к церкви тя зовущий, ты, отче Нифонте, потекл еси, и ко иконе Пречистыя Девы Богородицы, усердно взирая, слезные токи изливал еси. Тем же и мы, слышаще сия, со умилением взываем ти таковая:
Радуйся, к Матери Божией прибегший;
Радуйся, Ходатаицу о спасении грешных Ю познавший.
Радуйся, Надежду ненадежным Ю уразумевший;
Радуйся, Покров Божией Матери стяжавший.
Радуйся, смирением своим на милость Ее приклонивший;
Радуйся, Помощницу Ю и Заступницу у Сына и Бога Своего о тебе обретший.
Радуйся, «помилуй мя, Заступнице христианом» возопивший,
Радуйся, пред иконою Ея из глубины души возстенавший.
Радуйся, видев Икону Ея, аки склабящуюся, духовныя радости исполнившийся;
Радуйся, яко отсюду благодушество восприемший.
Радуйся, оттоле всегда Имя Ея Пресвятое во устах и в сердце обносивый;
Радуйся, выну в обстояниях Помощницу Ю себе стяжавший.
Радуйся, отче Нифонте достоблаженный!
Кондак 5
Боготечной звезде уподобился еси, отче наш, Нифонте богомудре, яко же бо звезда тече к Вифлеему, наставляя волхвов на поклонение рождшемуся Христу, тако и ты притекал еси к Споручнице спасения твоего, Владычице, вопия к Богу: Аллилуия!
Икос 5
Видеша отроцы Халдейстии на руку Девичу Создавшаго рукама человеки, видел еси и ты, отче Нифонте, в болезни сый, посещение тя багряницею одеянныя Владычицы мира со святою Анастасиею Узорешительницею, исцелити тя пришедшую. Сего ради ублажаем тя, сице поюще:
Радуйся, болезнию от Бога посещенный;
Радуйся, благодушно оную терпевый.
Радуйся, в болезни ничтоже иное, токмо «Cлава Тебе Боже!» глаголавый;
Радуйся, и сие: «Слава Помощнице моей, Пречистой Деве Марии» вещавый.
Радуйся, помазание елеем от кандила приемший;
Радуйся, знамение милосердия Божия тем познавший.
Радуйся, сим духовным врачеством исцеленный;
Радуйся, чудесно от одра болезненнаго возставший.
Радуйся, попечение о тебе Пречистыя Богоматере познавший;
Радуйся, с благодарением в церковь Божию притекший.
Радуйся, в день Преполовения Пасхи Святых Тайн приобщения сподобившийся;
Радуйся, от того времене иноческое житие восприемший.
Радуйся, отче Нифонте достоблаженный!
Кондак 6
Проповедник милосердия Божия и Пречистыя Девы Богородицы Матерняго благоутробия к кающимся искренно грешником ты явился еси, преподобне отче наш Нифонте, да и мы, многогрешные, последуем великому примеру твоего покаяния, взывая Богу: Аллилуия!
Икос 6
Возсиявый во Египте просвещение Истины и отгнавый лжи тьму, Христос Господь благоволи возсияти и в души твоей, Нифонте блаженне, своею благодатию, и отгнати темный облак лукаваго, нашедший на тя, тебя же из раба плоти и греха сотвори великаго Себе угодника. Сего ради, радующеся духом, взываем ти сице:
Радуйся, помощи Божия сподобльшийся,
Радуйся, осияние благодати Святаго Духа приявший.
Радуйся, ярем Христов на ся вземший;
Радуйся, иго благое Христово понесший.
Радуйся, бремя легкое иисусово восприемший;
Радуйся, во броня правды Христовой облекшийся.
Радуйся, на камени делания заповедей Божиих себе утвердивший;
Радуйся, щитом веры себе оградивший.
Радуйся, в нем вся стрелы лукаваго, разженныя, угасивший;
Радуйся, шлем спасения восприявший.
Радуйся, духа хульнаго, глаголющаго: «Несть Бога» посрамивший;
Радуйся, яко добр воин Христов над вражескими мечтании и страховании победу о Христе одержавший.
Радуйся, отче Нифонте достоблаженный!
Кондак 7
Хотящу Спасителю всего мира подати нам, грешным, образ милосердия своего к кающимся, да познаем, яко несть грех побеждающь человеколюбие Его, ибо «удиви в тебе», преподобне Нифонте, «вся хотения Своя», ты же воспевал еси немолчно Богу: Аллилуия!
Икос 7
Новые подвиги умерщвления плоти и самоотвержения показал еси, отче Нифонте, за прежде содеянные грехи, «творя плоды, достойны покаяния», тем же согласно вопием ти таковая:
Радуйся, аще и не в обители быв, но жестокое иноческое житие приемый;
Радуйся, храмину твою келлиею монашескою сотворивый.
Радуйся, зельным пощением плоть свою умерщлявый;
Радуйся, воду пред очесы токмо поставляя, жажду терпевый.
Радуйся, не о брашне, но о всяком глаголе, исходящем изо уст Божиих, помышлявый;
Радуйся, ранами Христа ради тело твое удручавый.
Радуйся, не глаголания ради праздных словес камень себе во уста влагавый;
Радуйся, ко Всенощному бдению притекавый.
Радуйся, сну, яко рабу повелевавый;
Радуйся, самовольный мученик явивыйся.
Радуйся, плоть твою Духови покоривый;
Радуйся, над страстями воцаривыйся.
Радуйся, отче Нифонте достоблаженный!
Кондак 8
Cтранное и чудное промышление о нас Творца и Владыки Бога, яко тебе, преподобне отче Нифонте, из сосуда нечестия содела благодатию Своею сосуд Духу Святому, ты же в радости духовней воспевал еси Ему: Аллилуия!
Икос 8
Весь бе в нижних и вышних Христос Господь, Бог наш, седяй бо одесную Отца, благоволи явитися тебе, прехвальный отче Нифонте, в видении объемля тя, яко чадолюбивый отец блуднаго сына. Тем же, таковому великому чудеси удивляющеся, со страхом и любовию вопием ти сице:
Радуйся, терпением твоим всю немощную силу вражию посрамивый;
Радуйся, покаянием твоим Бога на милость преклонивый.
Радуйся, смирением твоим на высоту добродетельнаго жития возшедший;
Радуйся, Отца Небеснаго благоутробие познавший.
Радуйся, объятий чадолюбиваго Отца сподобльшийся;
Радуйся, подобно блудному сыну, любезно им приятый.
Радуйся, глас Его отеческий слышавший;
Радуйся, ожидание Его твоего к Нему обращения познавший.
Радуйся, тем Божественным видением услажденный;
Радуйся, сим о прощении прежних грехов твоих извещенный.
Радуйся, по видении том слезы многи от радости душевныя излиявший;
Радуйся, тайну сию на прославление милосердия Божия ученику твоему поведавший.
Радуйся, отче Нифонте достоблаженный!
Кондак 9
Всякое естество, не токмо человеческое, но и ангельское удивися, яко за премногая твоя, преподобне отче Нифонте, борения с лукавыми бесы, дадеся тебе от Бога власть над ними: егда бо они, яко до тысящи нападоша на тя, ты же невидимою силою Божиею дал еси им по тысящи ран каждому, дондеже обещахуся с клятвою, яко идеже имя Нифонтово воспомянется, ни же приблизитися к месту тому, ты же во смирении взывал еси ко Всемогущему Богу: Аллилуия!
Икос 9
Витии многовещанные риторскими своими языки не возмогут достодолжно восхвалити твоя подвиги и чудеса, прехвальне отче Нифонте, мы же, любовию к тебе побеждаеми, во смирении нашем ублажаем тя сице:
Радуйся, по безчисленных твоих подвигах и трудех чудотворения дар от Бога приемый;
Радуйся, чудотворец и врач недугов человеческих явивыйся.
Радуйся, жены некия зельную зубную болезнь помазанием святым елеем исцеливый;
Радуйся, брата некоего, хульными помыслы обуреваема, советом твоим ободривый.
Радуйся, многая и преславная чудеса благодатию Божиею сотворивый;
Радуйся, чудес творение не своему благочестию и силе, но единому Богу приписуяй.
Радуйся, прозорливства дара сподобльшийся;
Радуйся, о прехождении по смерти душ человеческих откровение приемший.
Радуйся, достойных преставления на Небо зрящи, духом веселивыйся;
Радуйся, недостойных отвержение во ад с болезнию души оплакавый.
Радуйся, истязание душ на воздушных мытарствах зревый;
Радуйся, милосердием Божиим искупляемых и оправдаемых зревый.
Радуйся, отче Нифонте достоблаженный!
Кондак 10
Спасти хотя душу твою, о теле твоем всячески небрегл еси, отче, досточудный Нифонте, но в Богомыслие ум твой присно вперяя, сподобился еси ангельского видения и излияния мира на честную главу твою, тем же благоухания небеснаго исполнився, взывал еси к Богу: Аллилуия!
Икос 10
Стена есть девам Богородице Дево и всем, с верою к Ней притекающим, иже и ты, преподобне отче Нифонте, стяжал еси себе стену и ограждение от всех навет вражиих. Тем же, подобяся милосердию Царицы Небесной, и ты явися нам, грешным, стена и ограждение от злокозненных душетленных врагов. Сего ради, приглашаем тебе сицевая:
Радуйся, милосердие Царицы Небесной на себе познавший;
Радуйся, благоутробию Ея подражати тщавшийся,
Радуйся, болящия уврачевавый;
Радуйся, немощныя подкрепивый.
Радуйся, обуреваемых страстьми молитвами твоими в тишину душевную устроивый;
Радуйся, бесы от человек отгнавый.
Радуйся, грешников на пути спасения наставляяй;
Радуйся, собою им неложный пример подавый.
Радуйся, многоплетенная сети вражия ясно зревый;
Радуйся, вся оная молитвою твоею, яко паучину растерзавый.
Радуйся, и о нас, грешных, к Богу молитвенниче;
Радуйся, и нам, воспевающим память твою, помощниче.
Радуйся, отче Нифонте достоблаженный!
Кондак 11
Пение всякое побеждается величием подвигов и чудес твоих, всехвальный отче наш Нифонте, но и сего, да не премолчим, яко в видении зpел еси Апостола Павла, повелевающа тебе пасти царския овцы, еже прознаменоваше твое на Архиерейский престол возведение, того ради, прославляемому тобою Богу вопием немолчно: Аллилуия!
Икос 11
Светозарную свещу, поставленную на свещнице Церкви Христовой, зрим тебе, отче святителю Нифонте, — «не можаше бо светильник быти сокровен под спудом». Сего ради, похвальная восписуем ти, сице поюще:
Радуйся, бегая славы человеческия, смотрением Божиим во Александрию пришедший;
Радуйся, яко Патриарху Александру о тебе бысть откровение Божие.
Радуйся, яко зраком лица подобен был еси святому Апостолу Павлу;
Радуйся, яко подобно ему, и ты был еси сосуд избранный.
Радуйся, яко святый Архидиакон Афанасий виде Ангела, тебе сопутствующа;
Радуйся, яко он же узре «на главе твоей венец от камене честна».
Радуйся, во вся степени церковныя по чину посвященный;
Радуйся, во епископа Констанции, града Кипрскаго, хиротонисанный.
Радуйся, вся люди паствы твоея о сем возвеселивый;
Радуйся, c честию на престол твой препровожденный.
Радуйся, о врученной тебе Богом пастве зело прилежавый;
Радуйся, мысленные волки от нея отгнавый.
Радуйся, отче Нифонте достоблаженный!
Кондак 12
Благодать посвящения Архиерейскаго, аще и не хотяще, но обаче достойне приял еси, святителю Нифонте, и был еси истинный отец пастве твоей, яко же око слепым и нога хромым, горя бо духом, яко светильник великий, воспевал еси Богу: Аллилуия!
Икос 12
Поюще великое и дивное житие твое, святителю отче Нифонте, воспоминаем и блаженную кончину твою, со слезами сердечными воспевающе:
Радуйся, во иерарсех достойный;
Радуйся, во святителях преизящный.
Радуйся, пред святою кончиною твоею болезнь телесную благодушно терпевый;
Радуйся, яко злато в горниле искусивыйся.
Радуйся, Патриархом святым Афанасием посещенный;
Радуйся, беседою его услажденный.
Радуйся, пришествием ангелов утешенный;
Радуйся, на преставление твое пришедший лик мучеников видевый.
Радуйся, на скончании твоем сонм пророков зревый;
Радуйся, на последнее целование твое Собор всех Святых грядущий зревый.
Радуйся, на приятие праведныя души твоея посещения Святых, Святейшия Матери Божия сподобльшийся;
Радуйся, просветивыйся лицем, яко солнце, и предавший в руце Господни дух твой.
Радуйся, отче Нифонте достоблаженный!
Кондак 13
О, всехвальный и достоблаженнейший отче наш, святителю Нифонте, яко же в житии твоем многая искушения от диавола претерпевый и благодатию Божиею его до конца низложивый. Сице и нам, искушаемым, подаждь молитвами твоими, милосердием же Божиим помощь, и по кончине нашей от воздушных мытарств избавление, да со всеми покаявшимися грешники и мы сподобимся достигнути Царствия Небеснаго, и с тобою, ходатаем нашим, во веки веков воспевати Богу песнь Ангельскую: Аллилуия!
Кондак 13
О, всехвальный и достоблаженнейший отче наш, святителю Нифонте, яко же в житии твоем многая искушения от диавола претерпевый и благодатию Божиею его до конца низложивый. Сице и нам, искушаемым, подаждь молитвами твоими, милосердием же Божиим помощь, и по кончине нашей от воздушных мытарств избавление, да со всеми покаявшимися грешники и мы сподобимся достигнути Царствия Небеснаго, и с тобою, ходатаем нашим, во веки веков воспевати Богу песнь Ангельскую: Аллилуия!
Кондак 13
О, всехвальный и достоблаженнейший отче наш, святителю Нифонте, яко же в житии твоем многая искушения от диавола претерпевый и благодатию Божиею его до конца низложивый. Сице и нам, искушаемым, подаждь молитвами твоими, милосердием же Божиим помощь, и по кончине нашей от воздушных мытарств избавление, да со всеми покаявшимися грешники и мы сподобимся достигнути Царствия Небеснаго, и с тобою, ходатаем нашим, во веки веков воспевати Богу песнь Ангельскую: Аллилуия!
Икос 1
Ангел Хранитель, приставленный от Бога на хранение души, возрадовася о твоем обращении от тимения страстей на путь добродетельнаго жития, и с ним вси cвятии Ангели, по неложному словеси Христову: «яко велия радость бывает на Небеси о едином грешнице кающемся». Сего ради и мы, грешнии, радующеся о несказанном благоутробии Божием, похвальная восписуем ти, отче наш Нифонте, сице:
Радуйся, неизреченное милосердие Божие к кающимся грешником познавший;
Радуйся, и нам, грешным, образ покаяния собою подавший.
Радуйся, Споручницу спасения, Матерь Божию, стяжавший;
Радуйся, по Апостолу: «позор Ангелом и человеком бывший» .
Радуйся, из глубины рова страстей изшедший;
Радуйся, ко спасительному покаянию прибегший.
Радуйся, тину от умных очес отрясший;
Радуйся, ко свету благодати Божией прозревший.
Радуйся, зловония смрадных дел греховных избегший;
Радуйся, обоняние Христова благоухания вкусивший.
Радуйся, радость Ангелом сотворивший;
Радуйся, сатану до конца посрамивший.
Радуйся, отче Нифонте достоблаженный!
Кондак 1
Избранный Христом Сыном Божиим на прославление неизреченнаго Его милосердия к кающимся грешником, сподобльшийся ходатайства и заступления Пресвятыя Девы Богородицы, приими от нас, недостойных, восхваление:
Радуйся, отче Нифонте достоблаженный!
Молитва
О священная главо, преподобне отче, преблаженне авво Нифонте, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков. Аминь.
Отзыв (0)