Акафист Василию Декаполиту
Кондак 1
Избранный добродетелей подвижниче и учения Христова проповедниче, за веру Православную многие страдания претерпевый, преподобне отче наш Василие, похвальная восписуем ти по достоянию; ты же, яко имеяй дерзновение ко Христу Богу нашему, способствуй нам твоими молитвами спастися от всяких скорбей, бед и озлоблений, да зовим ти:
Радуйся, преподобне отче наш Василие, исповедниче добропобедный и молитвенниче о душах наших.
Икос 1
Ангелов Творец и Господь в буреносные дни нестроения церковнаго избря тя, святе Василие, в проповедника веры Православныя среди ересью иконоборчества одержимих. Ты же, яко добрый воин Христов, Креста оружием вооруженный, со усердием провозвещал еси учение Спасителя Нашего, за Него же многия страдания смиренне претерпевши, венцем исповедническим украсился еси на небесех, идеже молишися о всех, взывающих ти сице:
Радуйся, се бо ангелы ликуют с тобою на небеси;
Радуйся, яко и человецы восхваляют тя на земли.
Радуйся, святые иконы благочестно почитати нас научаяй;
Радуйся, нынешних иконохулителей обличаяй.
Радуйся, заблуждшихся на путь истины наставляяй;
Радуйся, в делании заповедей сердца наша утверждаяй.
Радуйся, огнем молитвы твоея стрелы вражия попаляяй;
Радуйся, беды и печали от чтущих тя отгоняяй.
Радуйся, преподобне отче наш Василие, исповедниче добропобедный и молитвенниче о душах наших.
Кондак 2
Видя суету жития мирскаго и слыша глас Пастыря Христа: «Иже хощет по мне идти, да отвержется себе и возмет крест свой», и ты, преславне Василие Декаполите, мир и вся благая его оставльши еси, да Единому Богу поживеши, песнопоя Ему: Аллилуиа.
Икос 2
Разум богомудрый и велию ревность по Бозе стяжал еси добродетельми, аки лествицею, от силы в силу восходил еси, проповедник и ревнитель благочестия явился еси. Мы же, похвальныя труды и подвизи твоя зряще, с благоговением и радостию глаголем ти сицевая:
Радуйся, суету земную ни во что же вменивый;
Радуйся, небесные сокровища зело возлюбивый.
Радуйся, все упование твое на Бога возложивый;
Радуйся, обетом девства чистоту сердца твоего явивый.
Радуйся, обетом послушания Богу и ближним твоим послуживый;
Радуйся, обетом нестяжания высоту духа твоего показавый.
Радуйся, молитве сердечной нас научающий;
Радуйся, от сна греховнаго души наша пробуждающий.
Радуйся, преподобне отче наш Василие, исповедниче добропобедный и молитвенниче о душах наших.
Кондак 3
Сила Христова осени тя, преподобне Василие, и дарова ти крепость мужественно претерпети искушения невидимаго врага, его же стрелы разженныя гасил еси слезными твоими к Богу молитвами; сего же ради, яко победитель воспеваеши ныне с безплотными силами песнь победную Христу Богу: Аллилуиа.
Икос 3
Имуще велию любовь к Господу, всеблаженне отче, плоть свою со страстьми и похотьми распял еси, постом и воздержанием страсти умервщлял еси. Сего ради восхволяем тя:
Радуйся, образ подвига иноческаго чрез все житие твое пронесший;
Радуйся, в ризу смирения христианскаго себе облекший.
Радуйся, по пути заповедей христовых неленостно ходивый;
Радуйся, от страстей себе подвигами очистивый.
Радуйся, плоть твою духови всецело покоривый;
Радуйся, бдение и молитву всем сердцем возлюбивый.
Радуйся, умиленным сердцем в вечной любви пребывавый;
Радуйся, благий образ служения Богу явивый.
Радуйся, преподобне отче наш Василие, исповедниче добропобедный и молитвенниче о душах наших.
Кондак 4
Буря ереси иконоборческия потресе державу Греческую, но невозможе поколебати веры твоея, всехвальне Василие, в истину учения Христова. Ты бо, пред образы святыя предстояще, ум свой на первообразная возведя, в тишине помыслов воспевал еси Творцу и Спасу Нашему: Аллилуиа.
Икос 4
Слышавше злочестивыя иконоборцы, яко ты, святый Василие, купно с преподобным Прокопием, о Христе братом твоим, не убоялся еси обличити их зловерие. Сего же ради взяша тя нечестивыя и лютым мучениям тя предаша. Мы же, сия ныне поминающе, таковые похвалы приносим ти:
Радуйся, со святым Прокопием в духовном общение пребывивый на земли;
Радуйся, яко купно с ним ныне о нас молишися на небеси.
Радуйся, душепагубных ересей и расколов обличителю;
Радуйся, правыя веры премудрый насадителю.
Радуйся, к истинному богопознанию путь указующий;
Радуйся, от прелести духовныя нас исцеляющий.
Радуйся, право стояти в вере Православной наставляющий;
Радуйся, в час испытаний благодатию Божию нас укрепляющий.
Радуйся, преподобне отче наш Василие, исповедниче добропобедный и молитвенниче о душах наших.
Кондак 5
Боготечной звездою прошел еси в мире сем, всехвальный исповедниче Христов Василие, веру бо твою в Воплотившагося Бога Слово пред обезумевшими иконоборцы дерзновенно исповедал еси, страдания многи и люти мужественне претерпел еси, Господу же, во дни испытаний твоих тя укрепляющему, воспевая: Аллилуиа.
Икос 5
Видим тя, прехвальне исподниче Василие, очима веры у Престола Божиего предстоящаго и за нас, грешных молящагося и твоим заступлением обретая в скорбех утешение; в недузех исцеление; в бедах скорое вспоможение, величаем возвеличевшаго тя Царя Славы Христа; тебе же, теплому предстателю нашему от любве сердечныя вопием:
Радуйся, в неизреченной славе Творца мира созерцаяй;
Радуйся, во благоухании святыни присно почиваяй.
Радуйся, ангелов сожителю и святых сомолитвенниче;
Радуйся, вся благая прошения наша исполняяй.
Радуйся, от плевел ненависти сердца наша очищаяй;
Радуйся, светом любве нелицемерныя нас озаряяй.
Радуйся, старых в изнеможении укрепление;
Радуйся, юных в благочестии утверждение.
Радуйся, преподобне отче наш Василие, исповедниче добропобедный и молитвенниче о душах наших.
Кондак 6
Проповедати веру твою пред обезумевшими иконоборцы не убоялся еси, всеславне Власилие, сего же ради тела иссечение, многолетнии заточении темничныя и иныя скорби велия кротце приял еси. Мы же, сия ныне поминающе, укрепившему тя Христу Богу Нашему благодарне вопием: Аллилуиа.
Икос 6
Возсиял еси, прехвальне Василие, подвиги твоими, егда многия скорби и муки истины ради Христовой претертел еси. Мы же, сия ныне поминающе, молим тя, укрепи и нас во дни испытаний наших, и прими величания сия:
Радуйся, правды Божия ради изгнанный;
Радуйся, от Господа вечною славою не небесех венчанный.
Радуйся, в темничное подземелье, яко во гроб, вверженый;
Радуйся, когтьми железными строганый.
Радуйся, кровию твоею торжество веры истинныя утверждающий;
Радуйся, иныя злострадания смиренне приявый.
Радуйся, древлим страстотерпцом подражавый;
Радуйся, подвиги твоими ангелов возвеселивый.
Радуйся, преподобне отче наш Василие, исповедниче добропобедный и молитвенниче о душах наших.
Кондак 7
Хотяще благоверная царице Феодора от прельщения диавольскаго державу свою очистити и Церковь Православную во истине Христовой утвердити, по кончине нечестивых царей Льва и Феофила, повеле возобновити и на веки веков соборне заповедати сохраняти святое иконопочитание. Ты же, преславный исповедниче Василие, сему радующеся, во славословии и благодарении Христу воспевал еси: Аллилуиа.
Икос 7
Новым трудом и подвигом всерадостно прилежал еси, богоблаженне Василие, егда по освобождении твоем из заточения темничнаго возвратился еси во обитель твою, в посте бо, молитве и богомыслии усердно подвизаясь, сосуд достоин явился еси благодати Всесвятаго Духа. Мы же, сия ныне поминающе, молим тя: озари и нас лучами добродетелей твоих и прими величания сия:
Радуйся, труды многими велию благодать стяжавый;
Радуйся, страстьми одержимых от гибели спасаяй.
Радуйся, к покаянию во гресех наших нас призываяй;
Радуйся, кающихся грешников со Христом примиряяй.
Радуйся, молитвами твоими от вечной погибели нас избавляяй;
Радуйся, в вере и благочестии нас утверждаяй.
Радуйся, скорби наша в радость претворяяй;
Радуйся, за вся благодарити Творца нас подвизаяй.
Радуйся, преподобне отче наш Василие, исповедниче добропобедный и молитвенниче о душах наших.
Кондак 8
Странному и неизреченному смирению воплотившагося Бога Слова подражая, блаженне ,сам исполнился еси великаго смирения и незлобия. Мы же ныне молим тя, угодниче Божий, предстательством твоим небесным испроси и нам сия боголюбезныя добродетели, да не поработимся страстем греховным, но благочестно воспоем Спасителю Нашему: Аллилуиа.
Икос 8
Всем сердцем Богу предался еси и всею душею Того возлюбил еси, отче преподобне Василие, ничтоже предпочитавше любве Христовы, проходяще путь земной по учению апостола в Дусе Святе, в силе Божией, с оружием правды в деснице и шуице. Того ради услыши и от нас, с надеждою и любовию возносимыя похвалы сия:
Радуйся, скорби и испытании в богатство духа обративый;
Радуйся, непрестанныя молитвы умиленно Творцу возносивый.
Радуйся, безмолвия древних Богоносных отец подражателю;
Радуйся, смиренномудрия искренний любителю.
Радуйся, незлобия присный хранителю;
Радуйся, лукавых духов крепких победителю.
Радуйся, целомудренных усердный охранителю;
Радуйся, унылых и отчаивающихся утешителю.
Радуйся, преподобне отче наш Василие, исповедниче добропобедный и молитвенниче о душах наших.
Кондак 9
Всяким добродетелем причастен явился еси свят и праведен в житии обретыйся своем, и сего же ради сбыстся на тебе слово Святаго Евангелия: «Вси хотящии благочестно жити, гонимы будут», но вся гонения и страдания претерпевый, яко истинный раб Христов, помози и нам искушения наша претерпеть и веру непоколебиму сохранити, даже до кончины нашея, молящия Подвигоположнику Христу Богу и Спасу Нашему: Аллилуиа.
Икос 9
Витийския многовещания и риторские хитрости отвергши, искренним точию сердцем в песнех духовных величаем тя, заступниче наш, преславный исповедниче Христов Василие, восхваляем многотрудное житие твое, торжествуем славу твою и покланяющеся святому образу твоему, умильно глаголем:
Радуйся, о спасении нашем Спасителя умоляяй;
Радуйся, милость Богородицы к нам приклоняяй.
Радуйся, на земныя нужды наша призираяй;
Радуйся, радости духовныя нас исполняяй.
Радуйся, от похотей и страстей плотских нас отвращаяй;
Радуйся, сущих во тьме и сени смертней светом истины озараяй.
Радуйся, Бога любити и волю Его творити нас научаяй;
Радуйся, скорбящих о гресех всерадостно утешаяй.
Радуйся, преподобне отче наш Василие, исповедниче добропобедный и молитвенниче о душах наших.
Кондак 10
Спасительнаго подвига твоего зряще течение, радуемся и веселимся о тебе, преподобне и богоносне отче наш Василие, яко в старости добрей свято и праведно жизнь земную о Господе скончал еси. Тем же ныне, Тому и о нас сотвори молитву, да благую, мирную и непостыдную кончину получити сподобимся, зовуще Ему: Аллилуиа.
Икос 10
Стена еси тверда и крепкая ограда буди нам, прехвальный исповедниче Василие с теплою верою и любовию к тебе ныне прибегающим, ограждаемы бо от враг видимых и невидимых, и избавляемы тобою, прославим тя тако:
Радуйся, на милость Божию уповати нас подвизающий;
Радуйся, всех приходящих к тебе благодатию Божиею озаряющий.
Радуйся, к благочестия подвигам нас призывающий;
Радуйся, тайно творити добродетели нас научающий.
Радуйся, бремя житейское носити нам облегчающий;
Радуйся, благая желания наша исполняющий.
Радуйся, духов злобы от нас прогоняющий;
Радуйся, от напрасныя смерти нас изымающий.
Радуйся, преподобне отче наш Василие, исповедниче добропобедный и молитвенниче о душах наших.
Кондак 11
Пение наше молебное не презри, богомудре и блаженне отче Василие, се бо любовию подвизаемы ко святому образу твоему притекаем и прославляюще Триединаго Бога просим тя: молися выну у Престола Царя Славы избавитися от скорбей и бед, да благодарне зовем Богу: Аллилуиа.
Икос 11
Светозарная свеща явися житие твое, преславный отче наш Василие, во мраце зловерия благодатию Божиею освещающе путь людем православным и направляюще их ко свету Христову. Тем же просим тя: просвети же и ныне тьму неверия, уныния и стеснения сердечнаго, находящаго на ны от маловерия и малодушия, да молитвами твоими ограждаеми и сохраняеми, зовем ти сице:
Радуйся, нечестивых и душетленных обычаев неуклонный искоренителю;
Радуйся, кротких и благих нравов благоискусный насадителю.
Радуйся, омраченныя умы наша светом Христовым озаряющий;
Радуйся, окаменелые сердца оживляющий.
Радуйся, приходящих к тебе от рабства диаволю свобождающий;
Радуйся, отчаявшихся на пути спасения руку помощи подавающий.
Радуйся, немощных в вере укрепляющий;
Радуйся, милосердие Божие к нам приклоняющий.
Радуйся, преподобне отче наш Василие, исповедниче добропобедный и молитвенниче о душах наших.
Кондак 12
Благодать Божию и милость нам подати, прощение грехов и исправление жития ниспослати, испросите нам у Господа, святые исповедники Василие и Прокопие, и не престайте о нас пред Лицем Вседержителя Бога моляще, яко стяжавши к Нему дерзновение многое. О сем же усердно к Вам припадающе, просим и благоумиленно зовем всех Творцу: Аллилуиа.
Икос 12
Поем дивное житие твое, угодниче Божий Василие, ублажаем велия и преславныя подвизи твоя, почитаем великое и славное исподведничество твое, величаем небесную славу твою, днесь бо предстоиши Престолу Вседержителя, и во умилении сердец наших смиренно приносим тебе похвалы сия:
Радуйся, со святою царицею Феодорою неусыпный о нас грешных ходатаю;
Радуйся, со святым исповедником Прокопием присный о нас печальниче.
Радуйся, ко спасению верный путеводителю;
Радуйся, постников и монахов богомудрый учителю.
Радуйся, живущим в миру дивный помощниче;
Радуйся, безмездный врачу болезней душевных и телесных.
Радуйся, предстателю крепкий на тя уповающих;
Радуйся, заступниче скорый тя призывающих.
Радуйся, преподобне отче наш Василие, исповедниче добропобедный и молитвенниче о душах наших.
Кондак 13
О многострадальне и преславне заступниче наш, преподобноисповедниче Василие! Дивную икону твою с благоговением лобзаем и к тебе взываем: малое моление прими от нас, недостойных чад твоих, от любве тебе приносимое и молися ко Господу, да подаст нам грехов прощение и сподобит вкупе с тобою во обителех небесных воспевати: Аллилуиа.
Кондак 13
О многострадальне и преславне заступниче наш, преподобноисповедниче Василие! Дивную икону твою с благоговением лобзаем и к тебе взываем: малое моление прими от нас, недостойных чад твоих, от любве тебе приносимое и молися ко Господу, да подаст нам грехов прощение и сподобит вкупе с тобою во обителех небесных воспевати: Аллилуиа.
Кондак 13
О многострадальне и преславне заступниче наш, преподобноисповедниче Василие! Дивную икону твою с благоговением лобзаем и к тебе взываем: малое моление прими от нас, недостойных чад твоих, от любве тебе приносимое и молися ко Господу, да подаст нам грехов прощение и сподобит вкупе с тобою во обителех небесных воспевати: Аллилуиа.
Икос 1
Ангелов Творец и Господь в буреносные дни нестроения церковнаго избря тя, святе Василие, в проповедника веры Православныя среди ересью иконоборчества одержимих. Ты же, яко добрый воин Христов, Креста оружием вооруженный, со усердием провозвещал еси учение Спасителя Нашего, за Него же многия страдания смиренне претерпевши, венцем исповедническим украсился еси на небесех, идеже молишися о всех, взывающих ти сице:
Радуйся, се бо ангелы ликуют с тобою на небеси;
Радуйся, яко и человецы восхваляют тя на земли.
Радуйся, святые иконы благочестно почитати нас научаяй;
Радуйся, нынешних иконохулителей обличаяй.
Радуйся, заблуждшихся на путь истины наставляяй;
Радуйся, в делании заповедей сердца наша утверждаяй.
Радуйся, огнем молитвы твоея стрелы вражия попаляяй;
Радуйся, беды и печали от чтущих тя отгоняяй.
Радуйся, преподобне отче наш Василие, исповедниче добропобедный и молитвенниче о душах наших.
Кондак 1
Избранный добродетелей подвижниче и учения Христова проповедниче, за веру Православную многие страдания претерпевый, преподобне отче наш Василие, похвальная восписуем ти по достоянию; ты же, яко имеяй дерзновение ко Христу Богу нашему, способствуй нам твоими молитвами спастися от всяких скорбей, бед и озлоблений, да зовим ти:
Радуйся, преподобне отче наш Василие, исповедниче добропобедный и молитвенниче о душах наших.
Отзыв (0)